Bhagavadgita 4.47

4.47

karmaṇīti | mumukṣostava śrutismṛtibhyāṃ vihite kāmyavarjite nitye naimittike ca karmaṇyevādhikāro yogyatā nānyatra jñānaniṣṭhāyāṃ saṃnyāse vetyanyayogavyavacchedārtha evakārastatrāpi karmaphaleṣu 'yajño dānaṃ tapaścaiva pāvanāni' iti, 'dharmeṇa pāpamapanudati' iti nityānāmapi phalaśravaṇāttatphaleṣu mā te adhikāraḥ nāsti yogyatā | kadācidapi karmaphaleṣvapekṣā na kartavyetyarthaḥ | karmaphaleṣvapekṣiteṣu satsu bīje satyaṅkuravatpunarjanmādayo duḥkhabhūmayaḥ svayameva syustasmānmā karmaphalaheturbhūḥ yathā svargakāmī svargaphalahetustathā tvametatkarmaphalaheturmābhūḥ | karmaphaleṣvapekṣāvānmā bhavetyarthaḥ | nanu phalaśūnyaṃ tatrāpi kleśapradhānaṃ karma kartuṃ na śakyate tadapekṣayā tattyāgaḥ sukhāvaha ityākāṅkṣāyāmārurukṣoḥ karmatyāgo na yukta ityāśayenāhamā ta iti | akarma karmavyatirekaḥ kriyātyāga iti yāvat | tasminnakarmaṇi te saṅgo manaḥsaktirmāstu | akaraṇe pratyavāyastaṃ na narako duryāniśca syāt | ato mumukṣoḥ karmasaṃnyāso na yukta ityarthaḥ | etena karmaphalānapekṣayā śraddhayā ceśvaraprītyarthaṃ bhaktyā karma kurvata eva mokṣo nānyatheti sūcitaṃ bhavati |
janmadiduḥkhaniḥśeṣanivṛttyapekṣaiva tavāsti cettarhi tvaṃ karmaiva kurvvetyupadiśati-