Bhagavadgita 4.48

4.48

yogastha iti | 'nirdoṣaṃ hi samaṃ brahma' iti vakṣyamāṇaṃ brahmātra samaśabdenocyate | samasya bhāvaḥ samatvaṃ tadeva jñānena yujyate prāpyata iti yoga ityucyate | tasmin yoge brahmaṇi svasya tadbhāvāpattaiyatadekāpekṣayā tiṣṭhatīti yogastho mokṣakakāmaḥ san tvaṃ saṅgaṃ etairmama duritakṣayo'stviti pratibandhivṛttirastviti vā, prasīdatvīśvaro mahyamiti vā, karmajanyaṃ phalaṃ me bhūyāditi vā, saṅgaḥ kāmastaṃ karmasu tyaktvā prārabdhasya karmaṇaḥ sāṅgatāsiddhistadabhāvo'siddhiḥ, īśvaraprasādaprāptiḥ siddhistadaprāptirasiddhiḥ, cittaprasaktiḥ siddhistadabhāvo'siddhirityādisiddhyasiddhyoḥ samo harṣaviṣādaśūnyo bhūtvā karmāṇi kleśātmakānyapi vihitānīti buddhyā kurvityarthaḥ |
mokṣecchayaiva phalānapekṣayā samabuddhyā ca karmāṇi nityāni naimittikāni ca kurvataścittaśuddhiryadā jāyate karmabhistatphalaiśca bhogyairna kimapyasti tucchairityalaṃbuddhilakṣaṇā tadā nikṛṣṭaphalade karmaṇyanāsthayā jñānayoga evādartavya iti bodhayati-