Bhagavadgita 4.50

4.50

buddhiyukta iti | buddhiḥ sāṃkhyaviṣayā niruktā tayā yuktaḥ jñānayogena yukto brahmavidārūḍhaḥ svasya kūṭasthāsaṅgacidātmatvavijñānabalenaiva ihaloke janmāntaraśataśatasahasreṣvadhunā jñānotpatteḥ prāgūrdhvaṃ ca kṛte nānāyonisahasraprāpake ubhe sukṛtaduṣkṛte jahāti | jñānāgninā nirmūlyātra jīvanneva mukto bhavati yasmāttasmāttvaṃ yogāya jñānayogāya yujyasva yatasva | nanu kṛcchracāndrāyaṇādiprāyaścittaistrisuparṇādijapairaśvamedhādiyāgairgaṅgādimahānadīsnānadānaiśca sarvapāpakṣaye sati kimarthaṃ jñānayogābhyāsakleśa iti cet na | tairniḥśeṣanivṛttyasaṃbhavāduktāḥ prāyaścittādayo yaduddeśena kriyante taistadeva nivartyate netarat | anyathā prāyaścittabhedavidhānarthakyaprasaṅgāt | ‘tarati brahmahatyāṃ yo'śvamedhena jayate’ iti brahmahatyāvyatiriktapāpataraṇāśravaṇātkṛte'pi prāyaścittyādau pāpasyaiva nivṛttirna tu puṇyasya śatakoṭijanmahetoḥ| nahi puṇyasya nivartakamasti mahatsādhanaṃ vinātmajñānaṃ | ‘tadā vidvānpuṇyapāpe vidhūya’ iti, ‘sa ya evaṃ vidvānete ātmānam̐spṛṇute’ iti smṛtāvatraivāsti ubhe sukṛtaduṣkṛte ityataḥ pāpapuṇyobhayātmakeṣu karmasu nivartitavyeṣu satsu yogo jñānayoga eva kauśalaṃ kuśalameva kauśalaṃ nipuṇaṃ jñānakuśalairdṛṣṭaṃ paraṃ sādhanaṃ tasmādyogāya yujyasveti pūrveṇānvayaḥ | jahātītyetrāsaṃdhirārṣaḥ |
phalānapekṣayā samabuddhyā ca samyaganuṣṭhitanityanaimittikakarmapariyākasaṃjātacittaśuddheḥ phalabhūtāyāḥ śravaṇādijanitā'vikriyā''tmatattvavijñānasiddheḥ phalamāha—