Bhagavadgita 4.51

4.51

karmajamiti | buddhiyuktāḥ buddhiḥ sāṃkhyabuddhirbrahmātmaikatvavijñānaṃ tayā yuktāstanniṣṭhāsaṃpannāḥ hi jñānayoganiṣṭhāḥ khalu manīṣiṇo vidvāṃsaḥ karmajaṃ karmabhyaḥ saṃcitādibhyo jātaṃ nānāyonisahasraprāpakaṃ phalaṃ janmādilakṣaṇaṃ tyaktvā ‘nimittāpāye naimittikasyāpyapāyaḥ’ iti nyāyena jñānāgninā sarveṣāmapi karmaṇāṃ dāhe sati tatphalānāṃ ca janmādīnāṃ dāhasaṃbhavāttena tyaktakarmaphalā bhavanti | ātmanaḥ kūṭasthatvāsaṅgatvavijñānaśaktivalena vidvāṃsaḥ svayaṃ karmaphalā'viṣayā bhūtvetyarthaḥ | janmabandhavinirmuktāḥ janmanā bandhaḥ saṃbandho yasya sa janmabandho deha uttarakālabhāvī vartamānaśca tena vinirmuktāḥ kāraṇābhāvādbhāvidehasaṃbandharahitāstādātmyābhāvādvartamānadehasaṃbandharahitāśca santaḥ svayamiha jīvanta evā'nāmayamadhyātmikādisarvopadravarahitaṃ nityaśuddhabuddhamuktasvabhāvamakhaṇḍānandaikarasaṃ padaṃ padyate jñānena prāpyata iti padaṃ paraṃ brahma gacchanti | avidyākṛtaṃ vāsanākṛtamapyanyabhāvaṃ parityajya tadbhāvameva prāpnuvantītyarthaḥ | hirhidṛḍhanubhavadyotanārthaḥ |
cittaśuddhijanyaṃ sarvatrāsaṃbuddhilakṣaṇaṃ vairāgyaṃ prajñāsthairyalakṣaṇaṃ yogaṃ ca kadā kena vā prāpsyāmītyabhiprāyamarjunasyālakṣya yadā tava buddhikāluṣyanivṛttiryadā vā prajñā nirvikalpā bhaviṣyati tadā vairāgyaṃ yogaṃ ca prāpsyasītyetadvayaṃ ślokadvayena krameṇa pratipādayati—