Bhagavadgita 4.52

4.52

yadeti| sadasadvivekaśūnyatayāntaḥkaraṇamasatsveva viṣayeṣu ramyamaramyamiṣṭamaniṣṭaṃ grāhyamagrāhyamiti yena rāgadveṣagrastaṃ satsarvadā pravartate tadeva mohakalilaṃ moho vicittatā viṣayajātametatsarvamasanmāyikaṃ tucchamiti vivekābhāvaḥ padārthāparijñānaṃ tadeva kalilaṃ kāluṣyaṃ darpaṇasya dhūlipaṭalavadvivekabuddherāvaraṇamevaṃlakṣaṇaṃ mohakalilaṃ te buddhiryadā vyatitariṣyati ‘yadidaṃ manasā vācā cakṣurbhyāṃ śravaṇādibhiḥ | naśvaraṃ gṛhyamāṇaṃ ca viddhi māyāmanomayam ||' ityādivacanārthasya samyaggrahaṇajanyeena śivaprasādamūlakena dṛśyamānaṃ sarvaṃ mithyaiveti niścayena yadā tyakṣyati tadā śrotavyasya śrutasya ca, draṣṭavyasya dṛṣṭasya ca, jñātavyasya jñātasya ca, gṛhītasya grāhyasya ca vastuno mithyātvameva vijñāya nirvedaṃ vairāgyaṃ sarvatrāsaṃbuddhilakṣaṇaṃ gantāsi prāpsyasi | vyavahāryasya mithyātvādvyavahārasya mithyārthagocaratvānniṣphalenānena mama kimiti sarvasmādvyavahāryādvyavahārāccoparato bhaviṣyasītyarthaḥ |
evaṃ mumukṣorjñānayogasiddhera sādhāraṇakāraṇaṃ bāhyoparamaṇaṃ nirūpyātha jñānayogasiddhiprakāramāha—