Bhagavadgita 4.64

4.64

rāgeti | rāgadveṣayorbījaṃ viṣayeṣviṣṭatvāniṣṭatvabuddhireva doṣadarśanena tasyāṃ parityaktāyāmindriyāṇi rāgadveṣaviyuktāni bhavanti taiḥ rāgadveṣaviyuktaiḥ| viṣayeṣvasattvatucchatvabandhakatvabuddhyā rāgadveṣābhyāṃ viyojitairityarthaḥ| tata evātmavaśyairātmanaḥ svasya vaśyaiḥ saṃkocavyākocayorvaśavartibhiḥ prasannairindriyaistu viṣayānnarasādīnaniṣiddhān | tatrāpi prāṇatrāṇamātraparyāptān caran bhuñjāno brahmavidyatirvidheyātmā vidheyaḥ indriyaśuddhyā samādhinā ca nirmuktarāgādidoṣatayā śuddhatvena svādhīna ātmā mano yasya sa vidheyātmā san | prasādaṃ cittasya svāsthyamatyantanirmalatāṃ gacchati | 'āhāraśuddhau sattvaśuddhiḥ sattvaśuddhau dhruvā smṛtiḥ' iti śravaṇādindriyaśuddhyā cittaśuddhiḥ sidhyatītyarthaḥ |
nityaṃ samādhiniṣṭhayā cendriyāṇāṃ manasaśca śuddhilakṣaṇaṃ prasādaṃ saṃpāditavato viduṣastatsiddheḥ phalamāha—