Bhagavadgita 4.65

4.65

prasāda iti | indriyaśuddhisiddheḥ prasāde prāpte sati asya viduṣaḥ sarvaduḥkhānām | atra duḥkhaśabdena taddhetavo vikṣepā lakṣyante | teṣāṃ sarveṣāṃ vikṣepāṇāṃ hānirniḥśeṣanivṛttirupajāyate | tata eva āśu śīghrameva prasannacetaso nirmalātmanastasya buddhiḥ sarvatra brahmadarśinī prajñā paryavatiṣṭhate | pratiṣṭhitā bhavatītyarthaḥ |
nityānityavivekavairāgyābhyāṃ tīvramumukṣutayā ca sarvaṃ saṃnyasya mumukṣavo ye yatayaḥ śravaṇaṃ kurvanti teṣāṃ muktiḥ samyagjñānena vinā na sidhyati, samyagjñānaṃ ca samādhiṃ vinā, samādhiścendriyanigrahaṃ vinā, indriyanigraho'pi niḥśeṣarāgādityāgaṃ vinā na sidhyatīti | yatato hyapi kaunteya ityādinā rāgadveṣaparityāgamindriyanigrahaṃ samādhyanuṣṭhānaṃ ca pratipādya dhyāyato viṣayānpuṃsa iti jñānino'pi bahirmukhasya jñānanāśādyanarthanipātaṃ pratipādyedānīṃ bahudhā śrutaśrāvitavedāntasya paṭhanapāṭhanamātreṇa ātmānaṃ kṛtārthaṃ manyamānasya mumukṣorālasyena durbuddhyā ca dhyānādāvapravṛttasya samādhiravaśyaṃ kartavya iti sūcayituṃ tadakarturanarthamāha-