Bhagavadgita 4.68

4.68

tasmāditi | rāgādiśatrusaṃhārasamarthasyaivātrādhikāro nānyasyeti sūcanārthaṃ mahāvāho iti saṃbodhanam | yasya mokṣakārthino yaterindriyārthebhyaḥ sarvāṇīndriyāṇi nigṛhītāni bhavanti tīvravairāgyeṇa tasya dhanyasya samādhiḥ sidhyati prajñā pratiṣṭhitā bhavati | videhamuktiragre tiṣṭhati tatsukhaṃ cetyarthaḥ |
janmānekaśatasahasrakṛtasukṛtaparipākena śrutyācāryeśvaraprasādapauṣkalyaṃ prāptavato yasya samādhinā sarvamidamahaṃ ca brahmaiveti brahmā'parokṣavijñānamapratibaddhaṃ bhavati tasya mahātmanaḥ sthitaprajñasya prabuddhasya svapnavyavahāravadahaṃmamedamityādivyavahāro laukiko vaidikaśca niḥśeṣo vinivartate | nidrāvadavidyāyā niḥśeṣavinaṣṭatvāttatkāryasyāpi niḥśeṣanivṛttiḥ, ataḥ prabuddho jāgara iva jīvanmukto brahmavidbrahmaṇyevāramati nānyatreti pratipādayati—