Bhagavadgita 3.46

3.46

yathā udapāne kūpādau yāvānarthaḥ prayojanaṃ jalapānādikaṃ tāvān viṣayakaśca sarvataḥ sarvasmin pūrṇe samplutodake hṛdādau bhavati, tathā sarveṣu vedeṣu kāmyakarmaṇo
yat phalamuktaṃ tāvat phalaṃ vijānataḥ parokṣajñāninaḥ brāhmaṇasya parokṣajñānadvārā brahmāparokṣajñānino bhavati¹
‘tasmin prasanne kimihāstyalabhyaṃ dharmārthakāmairalamalpakāste| samāśritāt brahmataroranantānniśreyasaṃ pakvaphalaṃ prayāta||’ iti vaiṣṇavokteḥ |
ayaṃ bhāvaḥ| putrādīnāṃ na svataḥ puruṣārthatvam| kintu tajjanyasukhameva puruṣārtham| tacca vaiṣayikaṃ sātiśayaṃ naśvaraṃ duḥkhasambhinnaṃ ca| bhagavadārādhanenāvirbhūtaṃ svarūpānandaniratiśayanityaduḥkhāsambhinnaṃ sukhaṃ yāvadbhogavaiṣayikānandebhyaḥ samūhīkṛtebhyo'pi koṭiguṇitam, atastacchrutvā kṣudrakāmān vihāyānandārthī kathaṃ na pravarteta? iti|
nanu niṣkāmakarmaṇā''tmajñānaṃ sampādya paramānandaprāptyai kriyate cet, prathamata ātmajñānameva sampādyatām| kiṃ bahvāyāsaiḥ karmabhirbahiraṅgasādhanaiḥ pratyuta cittavikṣepakaiḥ? ityata āha - karmaṇīti||