Shrutirahasya 4.1.38

4.1.38

asamarthasya kā gatiriticecchṛṇu | 'naktaṃ haviṣyānnamanodanaṃ vā phalaṃ tilāḥ kṣīramathāmbu cājyam | yatpañcagavyaṃ yadi vāpi vāyuḥ praśastamatrottaramuttaraṃ tvi'tyanenāpi prakāreṇaikādaśīvratāparityāga uktaḥ | vaiṣṇavasya tu viśeṣaḥ yadgṛhyārthamupakalpitaṃ tanniveditamevādyāt | 'anivedya na bhuñjīta yadāhārāya kalpita’ miti vacanāt | na ca bhagavanniveditasya parasvattvāt svasvattvābhāvācca kathamanthebhyopi dadyāt svayaṃ vā bhuñjīteti vācyam | bhaktāya dadyādityatra pratipattireva na dānam | tathāca bhaktatvāviśeṣātsvayamapi grāhyam | yathā yāgoddeśe tyaktapuroḍāśasyāpi ‘uttarārdhātsviṣṭakṛtamavadyati yajamānapañcamāḥ puroḍāśaṃ bhakṣayantī’ti pratipattistathātrāpi
vacanādeva tadbhaktebhyastatpratipattiḥ svayamapi bhuñjīta anyathā bhaktebhyopi na pratipādayet
dāne tu naivam , tasya svasvatvadhvaṃsena parasvatvāpādanarūpatvāt, evaṃ pādodake'pi | kiñca gītāsu
‘iṣṭān bhogān hi vo devā dāsyante yajñabhāvitāḥ | tairdattānapradāyaibhyo yo bhuṅkte stena eva sa’
ityatra ktvāpratyayasya samānakartṛkatvena ktvāsamabhivyāhṛtanañaḥ sāmānādhikaraṇyenānvayādbādhakaṃ
vinā devebhyopi dattamapi bhoktavyam | śrīviṣṇutattve'ntime paṭale ‘śeṣamuktiṃ praśaṃsanti
munayastattvadarśinaḥ | yuvānaḥ khalu vāñchanti tāmbūlaṃ taruṇīmukhādi’ti tairdattānityatra svayaṃ
niveditasya svabhogyatvaniṣedhastu na śrūyate pratyutāniveditabhojane nindā | brahmāṇḍapurāṇepi
‘patraṃ puṣpaṃ phalaṃ toyamannapānādyamauṣadham | anivedya na bhuñjīta yadāhārāya kalpitam | anivedya