Siddhivinishcaya 4.239
Siddhiviniścayaṭīkā 4.239
- Language
- Sanskrit
4.239
iti ityādinā upasaṃhāramāha--ityevam anantaraprakāreṇa mithyābhiniveśād asatyā''grahāt pramāṇaprameyavyavasthām atilaṅghayet pramāṇasya pramāṇatvasya, bhāvapradhānatvāt nirdeśasya, vyavasthā viśada eva abhrānta eva jñāne sthitiḥ tām atilaṅghayet atīva pralayaṃ nayet . tathāhi— bhūtebhyo'tyantamabhinnaṃ caitanyaṃ bhinnaṃ paśyat pratyakṣaṃ yadi pramāṇam; dvicandrādijñānaṃ kathaṃ na bhavet yato laukikī pratyakṣatadābhāsavyavasthāmanusaran laukāyatikaḥ syāt ? atha apramāṇam; dvicandrādijñānavat sarvamaviśeṣeṇa bhaved bhūtebhyo'bhinnasya svarūpasya tato bhinnasya sarveṇa grahaṇāt . nahi kiñcidvijñānam ātmānaṃ rūpādyātmakaṃ pratyeti sārūpyaniṣedhāt . tathāpi tasya tathā pratītikalpane sarvasya sarvadarśitvakalpane 'laukāyatikaṃ jagat syāt .