Dvadasharanayacakra 1.154

1.154

idānīṃ pratyekaṃ ta eva samuditā ityubhayaikaviṣayatve doṣaṃ vaktukāmaḥ pakṣāntaraṃ grāhayati --nīlaṃ ca sañcayaṃ ca pratyekasamuditakāraṇatvādvijñāsyatīti cet, syānmatam--ta eva hi nīlaparamāṇavaḥ pratyekaṃ śibikodvāhanyāyena samuditāśca kāraṇaṃ na caikaikaḥ, na ca samudāyastadvyatirikto'stītyubhayakāraṇatvaṃ jñānasya, tasmājjñānotpattihetvabhāvāsiddhiriti . etanna, yugapajjñānāsambhavāt, dvayorarthayoryugapadekajñānābhāvādekaikasmiṃścārthe yugapajjñānayorabhāvādbhavataḥ . yathoktam— vijānāti na vijñānamekamarthadvayaṃ yathā . ekamarthaṃ vijānāti na vijñānadvayaṃ tathā .. catuḥśa॰ 268 iti . syānmatam--hastena anekabadarāmalakādyarthagrahaṇavat syāditi . etaccāyuktam, jñānasya kriyāvaidharmyāt . jñānaṃ ca pratyakṣamucyate, kalpanāyā jñānāvyabhicārāt, pratyakṣaṃ kalpanāpoḍhaṃ yajjñānamarthe rūpādau nyāyapra॰ iti vacanāt . evaṃ rūparūpasamudāyayornānātve doṣaḥ .