Dvadasharanayacakra 1.175

1.175

tasmādevaṃ cetyādi . evaṃ coktavidhinā tasya tvayaivoktasya rūpāyatanasyaikasyaivaikatānekatā ca atastvayaivoktā . kasmāt ? tathā'vibhaktetyādi . tena prakāreṇa tathā, avibhaktaṃ tattvaṃ tadbhāvastattvaṃ yasya tadidamavibhaktatattvam, tadbhāvastattvamekānekatvādyavibhaktavastutattvam, tena tathā'vibhaktatattvena jñānotpatteriti hetuḥ . kasmin sādhye ? tasyaivaikānekatāyām . dṛśyate hi tadeva rūpāyatanamekamanekaṃ ca paramāṇavastatsamūhaśceti jñānotpattiḥ . dūrānmaṇisamūhamanekavarṇasaṃsthānaṃ paśyata ityudāharaṇamapyevamevaikānekarūpadravyarūpāyatanatve sādhye cakṣurvijñānādhārasya vastunaḥ sādharmyadṛṣṭāntatvaṃ bhajate, na ekāntaikānekarūpatve . tataścāvaśyameṣo'rtha āpadyate --syādekaṃ rūpāyatanaṃ syādanekaṃ rūpāyatanamiti . kasmāt ? snigdharūkṣatvābhyāṃ bandhaikyapariṇāmāpattestatsamūhagrāhyatvādekam, dravyārthāvasthānāt paramāṇūnāṃ svarūpabhinnānāṃ bhedādanekam . tata eva dravyam, rūpādiguṇaparyāyapariṇāmāpatteradravyam . pratisvamasādhāraṇarūpādipariṇāmāpekṣayā svalakṣaṇaviṣayam . sādhāraṇībhūtabhedasamūhāpekṣacākṣuṣatvādipariṇāmāpatteḥ sāmānyaviṣayam, nanu kadācicchabdaḥ kālāntaravacanaḥ, na, ekakāla evobhayarūpatvāt syāt tat tat syānna tat tat, grahaṇāpadeśaviśiṣṭārthatvāt, anekavarṇamaṇirūpavadekapuruṣapitṛputratvādivadvā . ato'napekṣitasvābhyupagamamanekāntadūṣaṇamāpadyate . avibhāvitaivamarthyapūrvā- yathoktam --bhedasaṅghātābhyāṃ cākṣuṣāḥ tattvārtha॰ 5 . 28 iti . uktahetuvaditi, tathā'vibhaktatattvajñānotpatterbhedābhedātmakajñānotpattivadetadapi vastu bhedābhedātmakamiti .