Dvadasharanayacakra 1.190

1.190

etadapi paramārthasadityabhimataṃ saṃvṛtisallakṣaṇānativṛtterasadeva, yathoktavidhinā saṃvṛtisadeva sarvamapītyatrāpi jñāpakodāharaṇaṃ tatsaṃvādyabhihitam --rajjvāṃ sarpa iti jñānam, tāvadeva rajjvāṃ sarpa iti viparyayajñānaṃ bhavati yāvadaspandādiviśeṣaliṅgādarśanam . viśeṣatastu tadavadhāraṇadṛṣṭau satyāṃ prāktanaṃ sarpadarśanaṃ jāyate'narthakam . sāpi rajjubuddhistadavayave dṛṣṭau satyāṃ yathā sarpa iti jñānamanarthakaṃ tathānarthikā, tata āha --tadaṃśadṛṣṭau tatrāpi sarpavad rajjuvibhrama iti . evamanayā kalpanayā sarvapiṇḍajñānānāṃ saṃvṛtisadviṣayataiveti sādhūktam--apratyakṣaṃ nīlādiviṣayaṃ cakṣurādivijñānaṃ śākyaputrīyaṃ bhrāntivaditi . evaṃ tāvat kalpanāpoḍhapratyakṣalakṣaṇasañcitālambanapañcavijñānakāyagranthavirodhodbhāvanacodyopakramāyātaparihārārthasyānekārthajanyasvārthasāmānyagocaravākyasya saprasaṅgo doṣo'bhihitaḥ .