Dvadasharanayacakra 1.200

1.200

kiñcānyat --cakṣurādijñāneṣvata ityādi yāvadanumānavirodhaḥ . cakṣurādīndriyabuddhayaḥ svaviṣayanirbhāsasvarūpamātrā eva, jñānatvāt, vastutvāt, sattvāt, taimirikādijñānavat . ataścakṣurādivijñāneṣu svanirbhāsavyatiriktaprameyābhāvaḥ . tataśca taimirikasya keśonduka-maśaka-makṣikā-dvicandrādidarśanavat sā tu asatsatpratipattireva, asadavastu sadvastu iti pratipattiḥ . tasmāddhetorasatsatpratipatterviparyayapratipattestasya jñānasyāpratyakṣatvaṃ prasiddhamalātacakrādijñānavat, tena apratyakṣatvena prasiddhena tvayā pratijñātaṃ tatpratyakṣatvaṃ nirākriyate, tannirākaraṇādanumānavirodhaḥ . nanu pratyakṣanirākaraṇāt pratyakṣavirodho'yaṃ kathamanumānavirodhaḥ ? ityatrocyate--tvanmatena pratyakṣadharmasya vikalpasyoktānumānena nirākaraṇānnirvikalpakapratyakṣatvābhāvāt katamat tat pratyakṣaṃ yena nirākriyeta yadvā nirākuryāt ? ato'numānavirodha evāyam .