Dvadasharanayacakra 1.218

1.218

kiñcānyat, tvanmatenaiva pratyakṣalakṣaṇāyogādayuktam . loke śāstre ca hi vastusvatattvasākṣātpratipattiḥ pratyakṣam, vastunaḥ svaṃ tattvamasādhāraṇamātmīyaṃ rūpam, yā tasya sākṣātpratipattirna vyavahitā sā pratyakṣam . tattu tvanmatavanna tvevaṃlakṣaṇaṃ pratyakṣam, tvanmata iva tvanmatavat, yathā sarvasarvātmakatve tvanmate śrotrādivṛtteḥ sarvasarvātmakavastvekadeśaśabdādiviṣayatvāt samudāyarūpatvādvastusvatattvasya vibhāgābhāvācchrotrādivṛttirna sambhavatītyuktaṃ tathā tasya nirvikalpasya vastuno vastusvatattvasākṣātpratipattyabhimataṃ laukikaṃ sāmayikaṃ ca pratyakṣalakṣaṇaṃ na ghaṭate, nirvikalpatvāsiddheḥ, naiva tannirvikalpaṃ pratyakṣaṃ śabdādivibhāgavikalpaviṣayatvāt, avibhāgarūpaṃ ca sarvasarvātmakaṃ vastusvatattvam, tadviṣayaṃ ca tanna bhavati, tataśca kalpanātmakam, kalpanātmakatvādibhyo bhrāntyādivad na pratyakṣam iti vartate, kalpanātmakatvānnirūpaṇavikalpātmakatvādālambanaviparītapratipattyātmakatvādadhyāropātmakatvādasāmānyarūpaviṣayatvāt tadatadviṣayavṛttitvāt sadasadabhedaparigrahātmakatvāt sarvathā sādhāraṇārthatvāt, bhrāntisaṃśayānumānādijñānavaditi .