Dvadasharanayacakra 1.94

1.94

atrocyate--maivaṃ maṃsthāḥ, nanu cetyādi . nanvityanujñāpane, tvayāpyetadiṣṭam--sarvaṃ deśādīti . tasmād deśādeḥ sarvatvāt sarvātmakatvam, sarvātmakatvācca vaiṣamyāvasthaiva . itiśabdo hetvarthe, yasmāllaukikaprakṛtitvameva prakṛteḥ sūktābhimatāyāḥ . katham ? yathā hi laukikī prakṛtirdeśādirviṣamāvasthaiva satī sarvakāraṇātmikā kāryātmikā viṣamā samā ca vyaktā cāvyaktā ca tathā sāṅkhyaparikalpitaprakṛtirapi syāt . kiṃ kāraṇam ? sarvātmakatvāt, deśādivad mayūrāṇḍakarasavad vā vaiṣamyāvasthaivetyarthaḥ . sāmyāvasthaiva vā deśāderapi, sarvātmakatvāt, prakṛtivaditi .