Dvadasharanayacakra 1.96

1.96

kāraṇāntaranirapekṣasya kāraṇasya svakāryākaraṇaṃ ca yuktiviruddhamityata āha --ātmāntaratvaprakāśanaṃ hītyādi yāvat pradhānasya dharma iti . ātmano'nya ātmā ātmāntaram, tasya bhāva ātmāntaratvaṃ parasparavibhinnamahadahaṅkārādyavasthāntaratvam, tasya prakāśanam . hiśabdo yasmādarthe, yasmādanabhivyakteḥ sāmyāvasthānasya ca pratipakṣo'vasthāntaraprakāratvena ātmaprakāśanamayaṃ prakṛterdharmaḥ . syānmatam--upāyānabhijñatvāt kāraṇāntaraṃ sācivyaguṇopetamapekṣata iti, etaccāyuktam, jñānārthatvāt . uktaṃ ca --dharmajñānavairāgyaiśvaryāṇi buddhidharmaḥrmā adharmājñānāvairāgyānaiśvaryāṇi ca . teṣāmaṣṭānāṃ saptabhirbadhnāti ekena mocayati iti tasya pradhānasya jñānārthasya pariṇatyavasthātmakasyāyuktā sacivāpekṣā . syānmatam--paratantratvāt sahāyāntaramapekṣate, tacca na, svatantratvāt . syānmatam--kvacit pradhānaṃ kāraṇaṃ kvacidanyat, avyāpitvāt, laukikakālādikāraṇavaditi . etaccāyuktam, apratihatasarvagatatvāt tasya .