Dvadasharanayacakra 3.103

3.103

ācārya āha --ā adyāpītyādi yāvacchabdādisvātmavaditi . nanvetatpratipādanameva vartate ananyatvaṃ guṇānām, tasmādekaikakāraṇam . yadi bhavatā guṇasandrāvo dravyamiṣyate tatastavā'pyetad dravyameva, na guṇāḥ pṛthak, sandrutānāmevāvasthānāt kuto'syāsandrāvaḥ ? na pradhānāvasthāyāṃ nāpi vyaktāvasthāyāmasandrāvaḥ, yato'syāsandrāvādadravyatvaṃ syāt . tasmād dravyameva, na pṛthag laghvādayo guṇā iti . tatrāpi ca pratijñāyate --sattvādayo guṇā laghutvādilakṣaṇāḥ tatsandrutilakṣaṇaṃ dravyameva, śabdādibhāvena vyavasthānāt, yo yaḥ śabdādibhāvena vyavatiṣṭhate sa so'rtho laghvādilakṣaṇaguṇasandruti dravyameva, śabdādisvātmavat, yathā śabdādisvātmānaḥ sattvādiguṇasandrutilakṣaṇaṃ dravyameva śabdādibhāvena vyavasthānāt tathā laghugurutvādilakṣaṇāḥ sattvādaya iti .