Dvadasharanayacakra 3.121

3.121

prayogaśca--asti pradhānaṃ bhedānāmanvayadarśanāt, ādhyātmikānāṃ bhedānāṃ kāryakāraṇātmakānāmekajātisamanvayo dṛṣṭa iti candanaśakalādidṛṣṭāntaṃ vakṣyati . sāmānyapūrvakāṇāṃ ca bhedānāmityādi ekajātisamanvayapradarśanārthasukhāditriguṇaikajātisamanvayaṃ kāryātmakānāṃ tatsanniveśaviśeṣatvaṃ pakṣīkṛtya ekakāryatvāt iti hetumāha tathottaratropasaṃhārāt . pañcānāṃ pañcānāmityādivīpsayā vyāptiṃ darśayati . tathā karaṇātmakānāṃ neyam . prasādādiśoṣādivaraṇādikāryātmakaṃ dṛṣṭaṃ guṇatrayaikajātisamanvitam . tairārabdhānyākāśādīni bhūtāni ekottaraguṇavṛddhyā tatkāryatvāt tatsamanvayācca tatpūrvakāṇi . tathā bāhyānāmapi tairyagyonamānuṣadaivānāṃ tatpūrvakateti . tasmāt traiguṇyasamanvitatvād bhedāstriguṇapūrvakāścandanaśakalādivat . śakalakapālāmatrabhūṣaṇaprabhṛtīnāmiti vyāptidarśanārthaṃ sādhanasya dṛṣṭāntabāhulyam .