Dvadasharanayacakra 3.133

3.133

tasmāt tato'nyo bhavati mukhyaḥ . ko'sau ? yaḥ kartā . kaḥ kartā ? ata āha --yaḥ svatantraḥ . kasmāt ? pravartanavṛttatvāt, pravartayataḥ kriyā pravartanam, tena pravartanena vṛttatvāt pravartayitṛtvena vṛttatvādityarthaḥ . pravartayaddhi kāraṇaṃ tadbhāvamāpadyate, śabdādi yathā pravartayat sattvarajastamolakṣaṇaṃ kāraṇaṃ śabdādibhāvamāpadyate tvanmatena . tathābhavanavṛttatvāt, tena pravartyamānarūpeṇa bhavanam, tena vṛttatvāt pravartayitāramantareṇābhavanādavṛttatvāt, tantupaṭavat, yathā tantavaḥ paṭaṃ pravartayantaḥ paṭasya kāraṇamityucyante paṭaśca tantukāryaṃ taiḥ pravartyatvāt . nanvete pradhānaśabdādipaṭādidṛṣṭāntā advaitavādaṃ samarthayantīti, ucyate--pravartayitṛtvamātrasādharmyāt tadabhyupagamya bhedena nidarśyate, anyathā puruṣādivadadvaitābhyupagame vidhyubhayaikāntotthānābhāvāt . bhāvyabhāvakabhedaprasiddheśca abhāvitasyāsattvād vandhyāputravadaṇudharmādayo'pi bhāvyamānā eva syurityetatsādharmyād dṛṣṭāntāḥ śabdādayaḥ .