Dvadasharanayacakra 3.43

3.43

tadupapādyase --avibhaktānekārthakāraṇamevedaṃ pṛthivyādi, avibhakto'nekārtho yasmiṃstadavibhaktānekārtham, kiṃ tat ? kāraṇamasya pṛthivyādeḥ tadavibhaktānekārthakāraṇaṃ pṛthivyādi, na vibhaktasukhādyanekārthātmakaikakāraṇapūrvakam . vibhaktā vṛttirasya pṛthivyādestad vibhaktavṛtti pṛthivyādi, sā vṛttiḥ pṛthivyudakaghaṭāditvāpattiḥ . mayūragrīvādīti, grīvābarhaśikhaṇḍādivṛttirvibhaktā tadātmānekārthāvibhaktāṇḍakarasagatakāraṇaiva . dadhyādivṛttiḥ kṣīrapūrvā, ādigrahaṇāt punaḥ śukrarasarudhirāṅgopāṅgādi . vrīhyādi pūrvoktam, ādigrahaṇādāmrapanasamātuluṅgādipatrapuṣpaphalādivṛttistadātmāvibhaktapūrvā . dṛṣṭāntabāhulyaṃ vyāpitvapradarśanārtham . uktavakṣyamāṇavat, vatkaraṇaṃ pratyekamabhisambadhyate uktavad vakṣyamāṇavat . puruṣaniyatyādyabhinnaikakāraṇavadityuktavat, ghaṭa eva sarvam iti vidhiniyama evaṃ vakṣyamāṇavat . evaṃ tāvat kāraṇamayavādo yathāsmābhiriṣṭastathā ghaṭate, na yathā tvayeṣṭa ityuktam .