Dvadasharanayacakra 3.81

3.81

etasya sādhanasyānaikāntikatvodbhāvanārthaṃ sādhanadvāreṇa paramatamāśaṅkyāha, athocyeta--aprakāśatvād naikānta ityādi sopasaṃhārahetukaprakāśanāprakāśanasādhane yāvat prakāśe iti . aprakāśatvād naikāntaḥ śakyate kartumiti, ayaṃ heturna śakya aikāntikaḥ kartum, yasmācchakyate vaktumitthamapi --puruṣaḥ sattvād na prakāśate na vyajyata iti . kasmāt ? aprakāśakatve sannihitaprakāśakārakatvāt, yadaprakāśakatve sannihitaprakāśakārakaṃ tadaprakāśamānaṃ dṛṣṭam, yathā pradīpeneva viyat . rajastamasī ca prakāśyete aprakāśakatvāt pradīpeneva pṛthivītyetat pūrveṇa sādhanena vyākhyātārthaṃ sat sannihitaprakāśakārakatvāditi na viśeṣyate . yathā ca viyatpṛthivyoraprakāśatvasāmānye satyeva kārakasānnidhye'pi prakāśāprakāśau dṛṣṭāvevaṃ puruṣasyāprakāśātmakatve'pyaprakāśataiva rajastamasoḥ sattvasya prakāśataiveti viśeṣo'stviti .