Dvadasharanayacakra 3.84

3.84

kiñcānyat, tairyathāsvamityādi . vaiśeṣikābhimatakāryādapyetat pāpīyo bhrāntimātratvāt . uktanyāyena te sattvādiṣu prakāśādayaḥ kāraṇeṣvasantaḥ, yathāsvam yo yaḥ svo yathāsvam, prakāśaḥ sattve nāsti itarāpekṣa utpannaḥ, evamitarāvapīti tairakāraṇasadbhiḥ prakāśādibhirārabdhaṃ parasparāśrayaṇena vyaktaṃ pravṛttaṃ niyataṃ ca yat kāryaṃ triguṇaṃ śabdādi tadapyalātacakravad bhrāntimātraṃ na paramārthato'stītyāpannam, tvaduktahetusāmarthyādeva tanmayārabdhatvādasadātmakaṃ hi tat, tvayaivoktaṃ hi yacca yanmayairārabdhaṃ tadātmakaṃ taditi śabdādīnāṃ sukhādyātmakatvaṃ śabdādyārabdhānāṃ bhūtānāṃ bhūtārabdhānāṃ ca śarīrādighaṭādīnām, tasmād vayamapi tathaiva brūmaḥ--śabdādi asadātmakaṃ tanmayairārabdhatvāt kārpāsikatantvārabdhapaṭakārpāsikatvavat, yathā kārpāsikaistantubhirārabdhaḥ paṭaḥ kārpāsika ityucyate tathā śabdādyasanmayaṃ tanmayaprakāśādyārabdhatvāditi . tanmayatanmayaṃ ceti yadapi ca bhūtādi śarīrādi ghaṭādi sarvamasadātmakaṃ tanmayatanmayārabdhatvāt kārpāsikapaṭakuṭerapi kārpāsikatvavaditi . tacchāstraprasiddhameva vodāharaṇaṃ rūpādisukhādimayatvavaditi . śabdasyāsanmayatve sādhye rūpādisukhādimayatvamudāharaṇam, rūpādīnāmapi tathaivāsanmayatvaṃ śabdādisukhādimayatvadṛṣṭāntenāpādyamiti .