Dvadasharanayacakra 4.60

4.60

tasmādeva yaduktaṃ pradhānamadhyamādhamāḥ puruṣakārāsteṣāṃ ca siddhayo'siddhayaśca pradhānamadhyamādhamā nānā na syuḥ iti tadayuktamuktam . puruṣakārāṇāṃ ca tatsādhyānāṃ ca siddhayo'siddhayaśca nānā syureva, na na syuḥ . kiṃ kāraṇam ? utkarṣaparamparāyā bahuprabhedāyā api ā mukteḥ puruṣasyaivāvyatiriktabhinnakāraṇatvāt . sa evāvyatirikto bhinnaśca kāraṇam, tasyaiva sarvaprabhedātmakatvād bhinnatvam, teṣāṃ ca karmanokarmabāhyarūpādibhedapudgalānāṃ puruṣopayogātmakatvādavyatiriktatvam . tasmāt puruṣakāranānātvaṃ tatsādhyasiddhyasiddhinānātvāni ca syureva, sa caika eva kāraṇaṃ syādeva . ko dṛṣṭāntaḥ ? ahibhogavistaraṇakuñcanavat, yathā ahiḥ sphaṭāṭopakuṇḍalakīkaraṇādyayugapadavasthāyidharmai rūpādibhiryugapadavasthāyibhiśca bhinno'pyavyatiriktābhinnāhitvasatyastadavyatiriktabhinnakāraṇatvāt pravartayitā tathā pāṇyādisaṅghātasahavartī puruṣa upayogātmā gatyādyutkarṣārthī teṣu yugapadayugapadbhāviṣu puruṣa eva satya iti .