Dvadasharanayacakra 4.64

4.64

evaṃ ca kṛtvā kriyāsahāyaśca sa phalaṃ prayacchati ekaśca sahāyībhūtāyāḥ kriyāyā api tacchaktimātratvāt, kriyāsahāyasya puruṣakārasya phalapradānaṃ sāpekṣānapekṣaśaktitvāt, bhārotpāṭavat, yathā bhāramutpāṭayan kaścit puruṣaḥ svayamevotpāṭayati, kaścit punaḥ sahāyāpekṣaḥ, evaṃ puruṣakāro'pi phalapradāne sahāyāṃ kriyāmapekṣate kaścit kaścinneti sopakramasya kriyāpekṣā na nirupakramasya . tatra sopa evamanayaiva diśā puruṣakāraikāntavādaḥ pratiṣedhyaḥ . yatraikasya svātantryaṃ tatra tatpradarśitatattvasya itarasyāpīti bhāvanīyam . tathāvagāhādilakṣaṇairastikāyaiḥ kramasya karmātmātmana ityādi yāvat tṛṇadāhavadveti tasyaiva sahaikībhūtasya ātmanaścetanācetanatvena puruṣātmanetyādinā sāpekṣān udayopaśamakṣayopaśamakṣayān avasthāviśeṣān darśayati sodāharaṇān .