Dvadasharanayacakra 5.62

5.62

śilāputrakaśarīravanneti cet . syānmatam--yathā śilāputrakasya śarīram ityatra śilāputrakādananyasminnapi śarīre svādiviṣayaśabdavācyatvadarśanādanaikāntikateti . etacca na, avasthāśarīraśabdaprayogānarthakyāt, yadyananyacchilāputrakācchilāputrakaśarīraṃ śilāputraka eva śarīraṃ śarīrameva śilāputrakaḥ iti ghaṭakuṭaśabdavat paryāyamātratvāt pratītapadārthakaṃ śrotāraṃ prati anyataraprayogānarthakyaṃ syād gatārthatvāt . tathā dravyamevāvasthā dravyāvasthetyanyatarānarthakyam . tasmādanyatarānarthakyād nedamupapannam, śilāputrakaśarīravad nānaikāntikateti . kiñcānyat, atrāpi śarīrāvasthākriyātvādayuktam, nanvasmābhirupapāditam--dravyakriyātmakaṃ sarvavastviti . tasmādatrāpi śilāputrakeṇa śīryate, śarārutvāccharīramiti śarāru bhavati, tena śarāruṇā bhūyata iti dravyakriyābhidhānaṃ nātivartate . tathā ca dravyāvasthā dravyamavatiṣṭhate dravyeṇāvasthīyate ityavasthānasya kriyātvānativṛttestato'nyatvameva . evaṃ tāvadavyutpattau .