Dvadasharanayacakra 8.12

Nyāyāgamānusāriṇī 8.12

Language: Sanskrit

8.12

evaṃ tarhi bhavitāpyabhavanaḥ khapuṣpavad na syāditi tulyamaniṣṭāpādanam . yathā bhavitrā vinā bhavanaṃ nāsti, tadviśiṣṭaṃ dṛṣṭam, tathā bhavitāpi bhavanena vinā nāsti, tadviśiṣṭo dṛṣṭa iti . etacca na tu bhavanamaviśeṣaṃ sāmānyamātraṃ kvacidapi bhavad dṛṣṭam, viśeṣeṇa tu bhavitrā vaśīkṛtaṃ dṛṣṭam, satyametat, vayamapi na brūmaḥ--bhavanaṃ nāstyeveti, kiṃ tarhi ? viśeṣapradhānaṃ svopasarjanaṃ tu dṛṣṭamiti na tulyatvamanayoḥ . kva tad dṛśyata iti cet, ucyate --kriyāghaṭetyādi . kriyāyāṃ kārakaṃ kartā, ghaṭe rūpādiḥ, vrīhau mūlādiḥ, devadattādau bālādiḥ, ete bhedā yasya tad bhavanasāmānyaṃ bhedapradhānaṃ dṛśyate loke viśeṣeṇopasarjanīkṛtaṃ pradhanena .

Previous: 8.11
Next: 8.13
Up: 8

Linked texts (1)

Dvādaśāranayacakra — Mallavādin, Sanskrit