Kalpah 2.6.9.2

2.6.9.2

traiṣṭubhaḥ panthā rudrā devatā vṛkeṇāparipareṇa pathā svasti rudrānaśīyeti mantram̐ saṃnamati .
uttareṇa havirdhānaṃ gatvottareṇā''gnīdhrīyaṃ dhiṣṇiyaṃ parītya dakṣiṇena vā mārjālīyamantareṇa vā.
pūrveṇa dvāreṇa sadaḥ praviśyādhvayuryajamāno brahmā cāvatiṣṭhante'greṇa praśāstrīyaṃ dhiṣṇiyaṃ parītyodgātāro mādhyaṃdinena pavamānena stuvate.
yadanyatpaśvānayanāttatsaṃpreṣyati pratiprasthātardadhidharmeṇa careti saṃpreṣasyāntam̐ saṃnamati .
vihṛteṣu vyāghāriteṣu dhiṣṇiyeṣu .
stīrṇe barhiṣi .
pratiprasthātā paśupuroḍāśaṃ nirū(ru)pya savanīyānnirvapati .
ekādaśakapālo'tra puroḍāśaḥ.
nā''mikṣā vidyate .
alaṃkṛteṣu pratiprasthātā dadhigharmeṇa carati .
yāvatī dyāvāpṛthivī ityāgnīdhrrāgāra audumbaryām̐ sruci dadhi gṛhṇāti .
vākca tvā manaśca śrīṇītāṃ prāṇaśca tvā'pānaśca śrīṇītāṃ cakṣuśca tvā śrotraṃ ca śrīṇītāṃ dakṣaśca tvā balaṃ ca śrīṇītāmojaśca tvā sahaśca śrīṇītāmāyuśca tvā jarā ca śrīṇītāmātmā ca tvā tanūśca śrīṇītām̐ śṛto'si śṛtaṃ kṛtaḥ śṛtāya tvā śṛtebhyastvetyāgnīdhrīye'dhiśritya .
hotarvadasva yatte vādyamiti saṃpreṣyati .
yadi śrāto juhotana yadyaśrāto mamattanetyucyamāne śrātam̐ haviriti pratyāha .
tamādāyā''havanīyaṃ gatvā''śrāvya pratyāśrāvite dadhigharmasya yajeti saṃpreṣyati .
yamindramāhurvaruṇaṃ yamāhuryaṃ mitramāhuryamu satyamāhuḥ . yo devānāṃ devatamastapojāstasmai tvā tebhyastvā svāheti vaṣaṭkṛte juhoti .
anuvaṣaṭkṛte hutvā harati bhakṣam .
taṃ bhakṣayanti ye pravargye .
tasyā''raṇye'nuvākyo bhakṣamantraḥ ..2..