Kalpah 2.6.9.6

2.6.9.6

yāste viśvāḥ samidhaḥ santyagna iti darbhānāhavanīye prāsyānyatrekṣamāṇo juhoti .
unnambhaya pṛthivīmiti vṛṣṭikāmasya juhuyāt .
na hutvā'nvīkṣeta .
nānuvaṣaṭkaroti na bhakṣayati sūdavatpātram̐ sādayati .
vasatīvarībhyo niṣicya nigrābhyāḥ karoti .
ya upām̐śupātre'm̐śustamṛjīṣe'pisṛjyādābhyām̐śumupām̐śupāvanau carjīṣaṃ tūṣṇīmabhiṣuṇvanti .
na grāvastute somoṣṇīṣaṃ prayacchati .
na pratiprasthātā grāvṇo'numodate.
atra savanīyānāṃ nirvapaṇameke samāmananti .
dhārāgrahaṇakāla āgrayaṇaṃ catasṛbhyo dhārābhyo gṛhṇātyādityapātrāccaturthīṃ dhārāṃ karoti .
taṃ gṛhītvā rājānamatipāvayati yāvantaṃ tṛtīyasavanāyā''ptaṃ manyate viramati dhārā prapīḍya pavitraṃ nidadhāti .
yatprākpavamānagrahebhyastasminkṛta āgnīdhrāgāre patnyāśiraṃ mathitvā'pareṇa dvāreṇa havirdhāne praviśyāsme devāso vapuṣe cikitsateti catasṛbhirāśiraṃ yajamānaḥ patnī ca tiraḥpavitraṃ pūtabhṛtyavanayataḥ .
pavamānagrahānkalaśānāgrayaṇaṃ ca grahāvakāśairupasthāya niḥsarpantaḥ samanvārabhante .
vaipruṣānsaptahotāraṃ ca hutvā''rbhavaṃ pavamānam̐ sarpanti tasya mādhyaṃdinena savanena kalpo vyākhyātaḥ .. 6 ..