Pamcasaga 2.2

2.2

jo suṇei so sāvago, evamiha kiriyāsaṃbaṃdho, ja iti sāmannaniddeso, teṇa jo koi jīvo, na puṇa visisukuluppanna eva, jahā māhaṇakuluppanna eva māhaṇo hoitti, kiriyāvisesanimittaṃ sāvagattaṃtikāuṃ, naṇu jo suṇei so sāvaotti evaṃ savaṇamettanibaṃdhaṇaṃ sāvagattaṃ pāvai, taṃ puṇa savvesiṃ soiṃdiyaladdhiṃjuttāṇaṃ saṃbhavai, visiḍaṃ ca sāvagattaṃ icchijjai, evamāsaṃkāe āha-jiṇavayaṇaṃti-savvannuāgamaṃ, kiṃ visiḍaṃ jiṇavayaṇaṃ ?, paralogahiyaṃ-paralogapatthaṃ, paralogasāhagaṃ, jiṇavayaṇameva suṇaṃto sāvago hoi, na puṇa joisanimittajoṇīpāhuḍāiṃ suṇaṃtovi, jao bhaṇiyaṃ “saṃpannadaṃsaṇāī paḍihiyaṃ jaiyaṇā suṇeī ya | sāmāyāriṃ paramaṃ jo khalu taṃ sāvagaṃ veṃti |
sammattaṃi sāvagadhammaṃ vocchaṃti puvvaṃ bhaṇiyaṃ, tattha sammattaṃ savvaguṇādhārottiṃkāuṃ paḍhamaṃ uddiṭṭhaṃ, jao bhaṇiyaṃ-“ mūlaṃ dāraṃ paiṭṭhāṇaṃ, ādhāro bhāyaṇaṃ nihī | dukkhassavi dhammassa, sammattaṃ parikittiyaṃ |
tamhā kammāṇīyaṃ jeumaṇe daṃsaṇaṃmi payaṭṭajjā | daṃsaṇavao hi sahalāṇi hoṃti tavaṇāṇacaraṇāṇi |
” huṃti-bhavaṃti, kāṇi ?, bhaṇai-vayapabhiīṇi-aṇuvayaguṇavayāīṇi, sarūveṇa kerisāṇi eyāṇi ? taṃ bhannai-bhavannavataraṃḍatullāṇitti-saṃsārasāgarataraṇanāvādisarisāni, niyameṇa-avassaṃbhāveṇa, bhaṇiyaṃ ya-“sammattaṃmi u laddhe palithapuhutteṇa sāvao hojjā | caraṇovasamakhayāṇaṃ sāgarasaṃkhaṃtarā hoṃti |