Vavahara 3: Uddeśaka 3
Vavahāra (Āgamasuttāṇi, ed. Dīparatnasāgara 2012) 3
- Language
- Ardhamāgadhī Prakrit
Uddeśaka 3
3.66
bhikkhū ya icchejjā gaṇaṃ dhārettae, bhagavaṃ ca se apalicchanne evaṃ se no kappai gaṇaṃ dhārettae|
bhagavaṃ ca se palicchanne evaṃ se kappai gaṇaṃ dhārettae|
3.67
bhikkhū ya icchejjā gaṇaṃ dhārettae, no se kappai there anāpucchittā gaṇaṃ dhārettae, kappai se there āpucchittā gaṇaṃ dhārettae|
therā ya se viyarejjā evaṃ se kappai gaṇaṃ dhārettae, therā ya se no viyarejjā evaṃ se no kappai gaṇaṃ dhārettae|
jaṇṇaṃ therehiṃ aviiṇṇaṃ gaṇaṃ dhārejjā, se saṃtarā cheo vā parihāro vā|
3.68
tivāsapariyāe samaṇe niggaṃthe āyārakusale saṃjamakusale pavayaṇakusale pannattikusale saṃgahakusale uvaggahakusale akkhayāyāre asabalāyāre abhinnāyāre asaṃkiliṭṭhāyāre bahussue babbhāgame jahanneṇaṃ āyārapakappadhare kappai uvajjhāyattāe uddisittae|
3.69
sa cceva ṇaṃ se tivāsapariyāe samaṇe niggaṃthe no āyārakusale no saṃjamakusale no pavayaṇakusale no pannattikusale no saṃgahakusale no uvaggahakusale khayāyāre sabalāyāre bhinnāyāre saṃkiliṭṭhāyāre appa-sue appāgame no kappai uvajjhāyattāe uddisittae|
3.70
paṃcavāsapariyāe samaṇe niggaṃthe āyārakusale saṃjamakusale pavayaṇakusale pannattikusale saṃgahakusale uvaggahakusale akkhayāyāre asabalāyāre abhinnāyāre asaṃkiliṭṭhāyāre bahussue babbhāgame jahanneṇaṃ dasā-kappa-vavahāradhare kappai āyariyauvajjhāyattāe uddisittae|
3.71
sa cceva ṇaṃ se paṃcavāsapariyāe samaṇe niggaṃthe no āyārakusale no saṃjamakusale no pavayaṇakusale no pannattikusale no saṃgahakusale no uvaggahakusale khayāyāre sabalāyāre bhinnāyāre saṃkiliṭṭhāyāre appasue appāgame no kappai āyariyauvajjhāyattāe uddisittae|
3.72
aṭṭhavāsapariyāe samaṇe niggaṃthe āyārakusale saṃjamakusale pavayaṇakusale pannattikusale saṃgahakusale uvaggahakusale akkhayāyāre asabalāyāre abhinnāyāre asaṃkiliṭṭhāyāre bahussue babbhāgame jahanneṇaṃ ṭhāṇasamavāyadhare kappai āyariyattāe uvajjhāyattāe pavattittāe therattāe gaṇittāe gaṇāvaccheiyattāe uddisittae|
3.73
sa cceva ṇaṃ se aṭṭhavāsapariyāe samaṇe niggaṃthe no āyārakusale no saṃjamakusale no pavayaṇakusale no pannattikusale no saṃgahakusale no uvaggahakusale khayāyāre sabalāyāre bhinnāyāre saṃkiliṭṭhāyāre appa-sue appāgame no kappai āyariyattāe jāva gaṇāvaccheiyattāe uddisittae|
3.74
niruddhapariyāe samaṇe niggaṃthe kappai taddivasaṃ āyariyauvajjhāyattāe uddisittae| se kimāhu bhaṃte?
atthi ṇaṃ therāṇaṃ tahārūvāṇi kulāṇi kaḍāṇi pattiyāṇi thejjāṇi vesāsiyāṇi saṃmayāṇi sammuikarāṇi anumayāṇi bahumayāṇi bhavaṃti, tehiṃ kaḍehiṃ tehiṃ pattiehiṃ tehiṃ thejjehiṃ tehiṃ vesāsiehiṃ tehiṃ saṃmaehiṃ tehiṃ sammuikarehiṃ jaṃ se niddhapariyāe samaṇe niggaṃthe, kappai āyariya-uvajjhāyattāe uddisittae taddivasaṃ|
3.75
niruddhavāsapariyāe samaṇe niggaṃthe kappai āyariya-uvajjhāyattāe uddisittae samuccheyakappaṃsi|
tassa ṇaṃ āyārapakappassa dese ahijjie dese no ahijjie, se ya ahijjissāmi tti ahijjai, evaṃ se kappai āyariya-uvajjhāyattāe uddisittae|
se ya ahijjissāmi tti no ahijjai, evaṃ se no kappai āyariya-uvajjhāyattāe uddisittae|
3.76
niggaṃthassa ṇaṃ navaḍaharataruṇassa āyariya-uvajjhāe vīsaṃbhejjā, no se kappai anāyariyauvajjhāyassa hottae|
kappai se puvvaṃ āyariyaṃ uddisāvettā tao pacchā uvajjhāyaṃ|
se kimāhu bhaṃte? dusaṃgahie samaṇe niggaṃthe, taṃ jahā–āyarieṇaṃ uvajjhāeṇa ya|
3.77
niggaṃthīe ṇaṃ navaḍaharataruṇīe āyariya-uvajjhāe pavattaṇī ya vīsaṃbhejjā, no se kappai, anāyariyauvajjhāiyāe apavattaṇīe ya hottae|
kappai se puvvaṃ āyariyaṃ uddisāvettā tao pacchā uvajjhāyaṃ tao pacchā pavattiṇiṃ|
se kimāhu bhaṃte? tisaṃgahiyā samaṇī niggaṃthī, taṃ jahā–āyarieṇaṃ uvajjhāeṇaṃ pavattiṇīe ya
3.78
bhikkhū ya gaṇāo avakkamma mehuṇadhammaṃ paḍisevejjā, tinni saṃvaccharāṇi tassa tappattiyaṃ no kappai āyarittaṃ vā uvajjhāyattaṃ vā pavattittaṃ vā therattaṃ vā gaṇittaṃ vā gaṇāvaccheiyattaṃ vā uddisittae vā dhāretae vā|
tihiṃ saṃvaccharehiṃ vīikkaṃtehiṃ cautthagaṃsi saṃvaccharaṃsi paṭṭhiyaṃsi ṭhiyassa uvasaṃtassa uvarayassa paḍivirayassa nivvigārasa evaṃ se kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.79
gaṇāvaccheie gaṇāvaccheiyattaṃ anikkhivittā mehuṇadhammaṃ paḍisevejjā, jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.80
gaṇāvaccheie gaṇāvaccheiyattaṃ nikkhivittā mehuṇadhammaṃ paḍisevejjā, tinni saṃvaccharāṇi tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
tihiṃ saṃvaccharehiṃ vīikkaṃtehiṃ cautthagaṃsi saṃvaccharaṃsi paṭṭhiyaṃsi ṭhiyassa uvasaṃtassa uvarayassa paḍivirayassa nivvigārassa, evaṃ se kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.81
āyariya-uvajjhāe āyariya-uvajjhāyattaṃ anikkhivittā mehuṇadhammaṃ paḍisevejjā, jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.82
āyariya-uvajjhāe āyariya-uvajjhāyattaṃ nikkhivittā mehuṇadhammaṃ paḍisevejjā, tinni saṃvaccharāṇi tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
tihiṃ saṃvaccharehiṃ vīikkaṃtehiṃ cautthagaṃsi saṃvaccharaṃsi paṭṭhiyaṃsi ṭhiyassa uvasaṃtassa uvarayassa paḍivirayassa nivvigārassa, evaṃ se kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.83
bhikkhū ya gaṇāo avakkamma ohāyai tinni saṃvaccharāṇi tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
tihiṃ saṃvaccharehiṃ vīikkaṃtehiṃ cautthagaṃsi saṃvaccharaṃsi paṭṭhiyaṃsi ṭhiyassa uvasaṃtassa uvarayassa paḍivirayassa nivvigārassa, evaṃ se kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.84
gaṇāvaccheie gaṇāvaccheiyattaṃ anikkhivittā ohāejjā, jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.85
gaṇāvaccheie gaṇāvaccheiyattaṃ nikkhivittā ohāejjā tinni saṃvaccharāṇi tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
tihiṃ saṃvaccharehiṃ vīikkaṃtehiṃ cautthagaṃsi saṃvaccharaṃsi paṭṭhiyaṃsi ṭhiyassa uvasaṃtassa uvarayassa paḍiviyarassa nivvigārassa, evaṃ se kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.86
āyariya-uvajjhāe āyariyauvajjhāyattaṃ anikkhivittā ohāejjā, jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.87
āyariya-uvajjhāe āyariyauvajjhāyattaṃ nikkhivittā ohāejjā, tinni saṃvaccharāṇi tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
tihiṃ saṃvaccharehiṃ vīikkaṃtehiṃ cautthagaṃsi saṃvaccharaṃsi paṭṭhiyaṃsi ṭhiyassa uvasaṃtassa uvarayassa paḍivirayassa nivvigārassa, evaṃ se kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.88
bhikkhū ya bahussue babbhāgame bahuso bahuāgāḍhāgāḍhesu kāraṇesu māī musāvāī asuī pāvajīvī jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.89
gaṇāvaccheie bahussue babbhāgame bahuso bahuāgāḍhāgāḍhesu kāraṇesu māī musāvāī asuī pāvajīvī, jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.90
āyariya-uvajjhāe bahussue babbhāgame bahuso bahuāgāḍhāgāḍhesu kāraṇesu māī musāvāī asuī pāvajīvī, jāvajjīvāe tassa tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.91
bahave bhikkhuṇo bahussuyā babbhāgamā bahuso bahuāgāḍhāgāḍhesu kāraṇesu māī musāvāī asuī pāvajīvī, jāvajjīvāe tesiṃ tappattiyaṃ no kappaī āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.92
bahave gaṇāvaccheiyā bahussuyā babbhāgamā bahuso bahuāgāḍhāgāḍhesu kāraṇesu māī musāvāī asuī pāvajīvī, tesiṃ tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.93
bahave āyariya-uvajjhāyā bahussuyā babbhāgamā bahuso bahuāgāḍhāgāḍhesu kāraṇesu māī musāvāī asuī pāvajīvī, jāvajjīvāe tesiṃ tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
3.94
bahave bhikkhuṇo bahave gaṇāvaccheiyā bahave āyariya-uvajjhāyā bahussuyā babbhāgamā bahuso bahuāgāḍhāgāḍhesu kāraṇesu māī musāvāī asuī pāvajīvī, jāvajjīvāe tesiṃ tappattiyaṃ no kappai āyariyattaṃ vā jāva gaṇāvaccheiyattaṃ vā uddisittae vā dhārettae vā|
Translations (2)
- Vavahāra: Hindi translation (Dīparatnasāgara, 2019) — Hindi
- Vavahāra: Gujarati translation (Dīparatnasāgara, 2020) — Gujarati
Commentaries (3)
- Vavahāra: ṭīkānusārī vivecana — Muni Dīparatnasāgara 2000, Gujarati
- Vyavahāravṛtti — Malayagiri, Sanskrit
- Vyavahārabhāṣya — Māhārāṣṭrī Prakrit