Mahanisiha 3.598

3.598

(1) tahā sāhu-sāhuṇi-samaṇovāsaga-saḍḍhigā'sesā-sanna-sāhammiyajaṇa-cauvviheṇaṃ pi samaṇa-saṃgheṇaṃ nitthāraga-pārago bhavejjā dhanno saṃpunna-salakkhaṇo si tumaṃ| ti uccāremāṇeṇaṃ gaṃdha-muṭṭhīo ghetavvāo|
(2) tao jaga-gurūṇaṃ jiṇiṃdāṇaṃ pūega-desāo gaṃdhaḍḍhā'milāṇa-siyamalladāmaṃ gahāya sa-hattheṇobhaya-khaṃ dhesumārovayamāṇeṇaṃ guruṇā nīsaṃdehamevaṃ bhāṇiyavvaṃ, jahā|
(3) bho bho jammaṃtara-saṃciya-guruya-punna-pabbhāra suladdha-suviḍhatta-susahala-manuyajammaṃ devānuppiyā ṭhaiyaṃ ca naraya-tiriya-gai-dāraṃ tujjhaṃ ti|
(4) abaṃdhago ya ayasa-akittī-ṇīyā-gotta-kamma-visesāṇaṃ tumaṃ ti, bhavaṃtara-gayassā vi u na dulaho tujjha paṃca namokkāro, |
(5) bhāvi-jammaṃtaresu paṃca-namokkāra-pabhāvāo ya jattha jatthovavajjejjā tattha tatthuttamā jāī uttamaṃ ca kula-rūvārogga-saṃpayaṃ ti, eyaṃ te nicchayao bhavejjā|
(6) annaṃ ca paṃcanamokkāra-pabhāvao na bhavai dāsattaṃ na dāridda-dūhaga-hīnajoṇiyattaṃ na vigaliṃdiyattaṃ ti|
(7) kiṃ bahueṇaṃ goyamā je kei eyāe vihīe paṃca-namokkārādi-suyanāṇa-mahīettāṇa tayatthāṇusāreṇaṃ payao savvāvassagāi niccāṇuṭṭhaṇijjesu aṭṭhārasa-sīlaṃgasahassesuṃ abhiramejjā, se ṇaṃ sarāgattāe jai ṇaṃ na nivvuḍe|
(8) tao geve-jja'nuttarādīsuṃ ciramabhirameūṇehauttama-kulappasūī ukkiṭṭhalaṭṭhasavvaṃgasuṃdarattaṃ savva-kalā-pattaṭṭha-janamanānaṃdayāriyattaṇaṃ ca pāviūṇaṃ
(9) suriṃde viva mahariddhīe egaṃteṇaṃ ca dayāṇukaṃpāpare, nivvinna-kāma-bhoge saddhammamanuṭṭheūṇaṃ vihuya-raya-male sijjhejjā|