Mahanisiha 3.600

3.600

(1) se bhayavaṃ sudukkaraṃ paṃca-maṃgala-mahāsuyakkhaṃdhassa viṇaovahāṇaṃ pannattaṃ, mahatī ya esā niyaṃtaṇā, kahaṃ bālehiṃ kajjai
(2) goyamā je ṇaṃ kei na icchejjā eyaṃ niyaṃtaṇaṃ, avinaovahāṇeṇaṃ ceva paṃcamaṃgalāi suya-nāṇamahijjiṇe ajjhāvei vā ajjhāvayamāṇassa vā aṇunnaṃ vā payāi|
(3) se ṇaṃ na bhavejjā piya-dhamme, na havejjā daḍha-dhamme, na bhavejjā bhattī-jue, hīle-jjā suttaṃ, hīlejjā atthaṃ, hīlejjā sutta-ttha-ubhae hīlejjā guruṃ|
(4) je ṇaṃ hīlejjā suttattho'bhae jāva ṇaṃ guruṃ, se ṇaṃ āsāejjā atītā'ṇāgaya-vaṭṭamāṇe titthayare, āsāejjā āyariya-uvajjhāya-sāhuṇo
(5) je ṇaṃ āsāejjā suya-nāṇamarihaṃta-siddha-sāhū, se tassa ṇaṃ sudīhayālamaṇaṃta-saṃsāra-sāgaramāhiṃḍemāṇassa tāsu tāsu saṃkuḍa viyaḍāsu culasīi-lakkha-parisaṃkhāṇāsu sīosiṇamissa-joṇīsu timisaṃdhayāraduggaṃdhā'mejjhacilīṇakhāramuttojjha-siṃbha paḍahacchavasa-jalula-pūya duddiṇa-ciliccila-ruhira-cikkhalla-duddaṃsaṇa-jaṃbāla-paṃka-vībhacchaghora-gabbhavāsesu kaḍha-kaḍha-kaḍheṃta-cala-cala-calassa ṭala-ṭala-ṭalassa rajjhaṃtasaṃpiṃḍiyaṃgamaṃgassa suiraṃ niyaṃtaṇā|
(6) je uṇa eyaṃ vihiṃ phāsejjā, no ṇaṃ maṇayaṃ pi aiyarejjā, jahutta-vihāṇeṇaṃ ceva paṃca-maṃgala-pabhii-suya-nāṇassa viṇaovahāṇaṃ karejjā|
(7) se ṇaṃ goyamā no hīlejjā suttaṃ, no hīlejjā atthaṃ, no hīlejjā suttatthobhae|
(8) se ṇaṃ no āsāejjā tikāla-bhāvī-titthakare, no āsāejjā tiloga-siharavāsī vihūya-raya-male siddhe, no āsāejjā, āyariya-uvajjhāya sāhuṇo|
(9) suṭṭhu-yaraṃ ceva-bhavejjā piya-dhamme, daḍha-dhamme, bhattī-jutte, egaṃteṇaṃ bhavejjā suttatthānu-raṃjiyamāṇassa-saddhā-saṃvegamāvanne|
(10) se esa ṇaṃ na labhejjā puṇo puṇo bhava-cārage gabbha-vāsāiyaṃ anegahā jaṃtanaṃ ti|