Gita Govinda 24.2

24.2

keśava yāhi | svayoṣiti ratatve kimucyate | praśastāḥ keśā yasyeti keśavapadavyutpatteḥ | tvaṃ keśasaṃskāravatīṣu svairiṇīṣu rata iti keśavaśabdavyaṅgyam | ato he keśava, bahuvallabha, tvadekaparāyaṇo'hamityādikaitavavādaṃ chalavākyaṃ mā vada | viṣaṇṇe mayi kimakāraṇaroṣaṇe roṣa ityāśaṅkase cet | maivam | kumudalocana, yā tava viṣādaṃ harati tāmeva bahupriyāmanusara | anurūpasyānurūpāyāmanurūpaṃ suratamiti | kumudagrahaṇena somavaṃśodbhūtatvādrātrau jāgaro divā śayo lakṣyate | iti dhruvaḥ || atha padāni | rajanīti | he kṛṣṇa, tvaṃ nayanamanurāgamiva vahaṃsi | kiṃ bhūtamanurāgam | sphuṭamatibāhulyenāntarvyāpya bahirniryātum | punaḥ kiṃbhūtam | uditarasasya śṛṅgārasyābhiniveśa āgraho yatra | athānurāgaviśeṣaṇatvena uditaḥ khādasyābhilāṣasyāgraho yatreti | kiṃbhūtaṃ nayanam | rajanijanito yo'sau gurujāgararāgaḥ tena kaṣāyitaṃ lohitīkṛtam | punaḥ kiṃbhūtam | alasaḥ niveśo'svasthānaṃ yatra | atra 'vahati' iti pāṭhāntarapakṣe taveti pūrvapakṣasthānuṣaṅgena nayanaṃ kartṛ sphuṭamanurāgaṃ vahatīti yojyam |
tava vapū ratijayalekhamanuharatīva anukarotīva | idaṃ vapurna mayā sarve jitamiti kāminaḥ prati kāmajāyāpreṣyalekho'yam | anena strīpreṣyatvena tasyādhamatvaṃ sūcitamiti vyaṅgyo'rthaḥ | kiṃbhūtaṃ vapuḥ | smarasamara iva saṅgare kāmavilāse kharanakharāṇāṃ kṣatarekhā yatra | atrāpi kharagrahaṇaṃ vilāsabhaṅge hetuḥ | tasyāḥ saṃbandhinaṃ lekhamiti vapurnakhakṣatānāṃ lekhenopameyagarbhaviśeṣaṇamāha | marakataśakale kalitāyāḥ kaladhautalipeḥ saṃbandhinam| athavā liperityatra pañcamī | tatraivaṃ liperiveti yojanīyam | kaladhautalipimiveti yuktaḥ pāṭhaḥ |