Gita Govinda 34.8

34.8

api ca | śrījayadeveti | he janāḥ suciraṃ hariṃ hṛdi vinidhāya praṇamata | kiṃbhūtaṃ harim | sukṛtodaye sāram | punaḥ kiṃbhūtam | śrījayadevabhaṇito yo vibhavaḥ sāmarthyaṃ tena dviguṇīkṛtāṃ bhūṣaṇabhāṃ śobhāṃ ṛcchatīti | athavā dviguṇīkṛtāṃ bhūṣaṇabhāṃ rātīti | etatkṛtvā ukteṣṭado bhavatīti | athavā śrījayadevabhaṇitena vibhavanvibhurbhavandviguṇīkṛto bhūṣaṇānāṃ bhāraḥ samūho yena | jayadevabhaṇitaṃ śrutvā bhūṣaṇānāmanādaro'bhūdityarthaḥ || krameṇa naṭṭakedāraśrīrāgasthānagauḍakāḥ | dhoraṇīmālavīyaśca varāṭī megharāgakaḥ || mālavaśrīrdevaśākho gauṇḍakṛccātha bhairavī | dhannāsikā vasantaśca gurjarī ca malhārakaḥ || lalitaḥ saptadaśamo rāgāstāvanti ca kramāt | padāni teṣu tālāḥ syuritastannāma kīrtyate || ādyatrisaptadaśamadvādaśe drutamaṇṭhakāḥ | dvitīye navame caikādaśe caiva trayodaśe || pade pañcadaśe.saptadaśe rūpaka īritaḥ | caturthe prati tālavyāṃ drutālaḥ pañcame smṛtaḥ | tripuṭaḥ ṣaṣṭhāṣṭamayoḥ syāddrutapratimaṇṭhakaḥ | caturdaśe ṣoḍaśe ca bhadraḥ syuḥ pratitālakam | madhyamādau punarmuktiḥ śṛṅgāraḥ sābhilāṣayoḥ | strīpuṃsayoruttamasya nāyakasyopavarṇanam | kaiśikīṃ rītimāśritya padānāṃ khakhanāmatā | chandaḥ svecchāviracitaṃ rūpake yatra dṛśyate | sarāgaśreṇināmāyaṃ prītikṛtkamalāpateḥ || iti sānandagovindarāgaśreṇikusumābharaṇanāmā dvāviṃśatitamaḥ prabandhaḥ |
idānīṃ rādhāyā api sāttvikabhāvotpattiṃ darśayati—atikramyeti | idānīṃ rādhāyā akṣṇorharṣāśrunikaraḥ papāta kva | priyatamasamāyātasamaye priyatamasya samāyātaṃ samāgamastasya samaye kāle | ka iva | apāṅgaṃ netraprāntamatikramya śravaṇapathaparyantagamanaprayāseneva | svedāmbupūra iva | kiṃbhūtayornetrayoḥ priyadarśanākāṅkṣayā atiśayena cañcalatvaṃ prāpitayoḥ
idānīṃ mīlitāyāṃ tasyāṃ sakhīkṛtamāha-bhajantyā iti | mṛgadṛśo rādhāyā lajjāpi atidūraṃ vyagamat | kiṃbhūtā lajjā | lajjāsahitā | kiṃbhūtāyāḥ | priyāsyaṃ paśyantyāḥ | kiṃbhūtaṃ priyāsyam | smaraparavaśaṃ yadākūtamabhiprāyastena subhagaṃ sundaram | punaḥ kiṃbhūtāyāḥ | talpāntaṃ talpasamīpaṃ vrajantyā āśrayantyāḥ | kva sati | avahitālīparijane'vahitaḥ sāvadhāno yaḥ sakhīlakṣaṇaḥ parijanastasmingehādbahirgṛhādbahiryāte sati | kathaṃ yathā syāttathā | kṛtā yā kapaṭakaṇḍūtistayā pihitamācchāditaṃ smitaṃ yathā syāttathā | śikhariṇīvṛttam | avyaṅgyo bhāvo rasavadalaṃkāratā |