Gita Govinda 1.12

1.12

pratyekāvatārapuraskāreṇa bhagavataḥ stutiṃ kṛtvā saṃprati samuditadaśāvatārapuraskāreṇa śrīkṛṣṇaṃ stauti—dhṛtadaśavidheti | dhṛtāni daśavidhāni rūpāṇi yena tādṛśa, tvaṃ jaya | saṃprati jayadevakaviḥ saṃpradāyāgatatvena gīte svanāma nibadhnan kṛtāṃ bhagavataḥ stutiṃ kṛpayānyānapi śrāvayitumāha—śrījayadeveti | idaṃ jayadevakaveruditaṃ bhāṣitaṃ śṛṇu | kiṃbhūtam | sukhadaṃ śrotramanaḥsukhapradam | punaḥ kīdṛśam | śubhadaṃ maṅgalapradam | kṛṣṇakīrtanatvāt | ata eva bhavasāraṃ śreṣṭhamahādhanarūpaṃ vā | ata evodāraṃ mahat | 'vidhā vidhau prakāre ca' ityamaraḥ | 'uktaṃ bhāṣitamuditam' iti ca | 'udāro dātṛmahatauḥ' ityapi | 'kalyāṇaṃ maṅgalaṃ śubham' iti ca |