Gita Govinda 4.2

4.2

rambhasaṃbhrameṇāliṅganādareṇa sphuran yo manohārivilāsastasya lālasotsukyaṃ yasya tādṛśam | ‘saṃbhramāvabhramicchanti bhayamudvegamādaram’ | ‘so'tyarthe lālasā dvayoḥ’ ityamaraḥ | ‘ārāddūrasamīpayoḥ’ iti ca |
gopīnāṃ saundaryavilāsādhanabhijñatvaṃ ca kathayanneva kelimāha-pīneti | kācidgopavadhūḥ pīnapayodharabhārabhareṇa pīnastanagauravātiśayena sarāgaṃ sānurāgaṃ yathāsyādevaṃ hariṃ parirabhyāliṅgya udañcita ūrdhvamañcitaḥ pañcamākhyo rāgo yatra evaṃ yathā syāttathānugāyati anupaścāddarairgānānantaraṃ gāyati | atra gopyāḥ saundaryaṃ pīnapayodharetyādinā pratipāditam | avaidagdhyaṃ tu kṛṣṇasya parirambhodyamaṃ vinaiva svayaṃ prathamaṃ parirambhaṇāt | anyonyakṛte hi parirambhe śṛṅgārarasaḥ puṣṭo bhavati | taduktaṃ daśarūpake-'ramyadeśakalākāleveṣabhogādisevanaiḥ | pramodātpramadaratiḥ saiva yūnoranyonyasaktayoḥ | prakṛṣyamāṇaḥ śṛṅgāro madhurāṅgāviceṣṭitaiḥ ||' iti | śṛṅgāre pañcamaḥ svaro bāhulyena bhavati sa evātra kathitaḥ| yadāha bharataḥ-'madhyamaṃ pañcamabhūyiṣṭhaṃ hāsyaśṛṅgārayorbhavet' iti |