The Great Epic of the Bhārata dynasty 6.42.54

6.42.54

asyaivaṃ śāntasya kevalasya yogino vyutthānāvasthāmāha -- brahmabhūta iti | yo hi suptau laye vā nipatito yogī vyutthāne jaḍadehastamograstacitta iva tandrāluruttiṣṭhati, brahmabhūtastu prasannātmā prasannacetāḥ laghuśarīraḥ amṛteneva samādhisukhena tṛptastadekapravaṇo na śocati naṣṭam | nāpyaprāptaṃ kāṅkṣati dārādikam | sarveṣu bhūteṣu caturvidheṣu samaḥ brahmaivedaṃ sarvamiti buddhyā vaiṣamyavarjitaḥ san parāṃ madbhaktiṃ dvaitadṛṣṭivivarjitāṃ bhāvanāṃ labhate | pātañjalayogī tu na vyutthāne parāṃ dṛṣṭiṃ labhate bhedadarśitvāt | ayaṃ ca bhaktaḥ śrībhāgavate darśitaḥ “sarvabhūteṣu yenaikaṃ bhagavadbhāvamīkṣate | bhūtāni bhagavatyātmanyeṣa bhāgavatottamaḥ” iti | so'yaṃ caturtho bhakto ‘jñānī tvātmaiva me matam’ iti bhagavatāpi darśitaḥ ||