The Recognition of Śakuntalā 10.5.112

10.5.112

pṛthivyā yaḥ śaraṇaṃ rakṣakaḥ sa tava samīpe vartate | kathaṃ gate eva | āvegena saṃbhrameṇa | ākulatvenetyarthaḥ | kiṃ śītalaiiriti | nalinaṃ padmaṃ vidyate yasyāḥ sā nalinī tasyā dalāni kamalinīpalāśāni tānyeva tālavṛntāni vyajanāni taiḥ | nalinīpadena saugandhyaṃ sūcitam | ataeva na bisinītyādi | bahuvacanena pratikṣaṇaṃ bhinnasyopādīyamānatayā dattaviśeṣaṇadvayena yogyatā sūcitā | ekasya bahukālaṃ sthitasya tayojyatvābhāvāt | “ vyajanaṃ tālavṛntakam ” ityamaraḥ | ārdravātāñśītalataravātān | ārdratvena śaityaṃ lakṣyate | tadatiśayaḥ phalam | samyaṅmandaṃmandaṃ racayāmi karomi na tūccaiḥ | kimiti praśne | kīdṛśaiḥ | śītalaiḥ śītalasparśaiḥ | yāni svayaṃ śītalāni tajjanyo vāyuḥ sutarāṃ śītala ityārdrapadārthasya hetutvena yojyam | punaḥ kīdṛśaiḥ | klamaṃ viśeṣeṇa nudanti taiḥ klāntiharaiḥ | yāni dṛṣṭāni spṛṣṭānyāghrātāni svayaṃ klamacchindi tajjanyo vāyuḥ sutarāṃ klamacchiditi bhāvaḥ | uteti vikalpe | “ maṇibandhādākaniṣṭhaṃ karasya karabho bahiḥ ” | tadvadūrū yasyāstatsaṃbodhanam | atrānuvṛttatvakomalatvādayaḥ sāmānyadharmāḥ | te padmatāmrau kuśeśayālohitau | padi mātīti padmam | tena saha sāmyaṃ nāstīti tāmratvamātreṇa sāmyam | ataeva nāravindādipadopādānam | karabhorupadmatāmrāvitipadābhyāṃ caraṇayoḥ saṃvāhanayogyatvaṃ dhvanitam | caraṇāvaṅke nidhāyetyanena tasyāḥ saubhāgyasarvaṃkaṣatvaṃ svasya dhanyataratvaṃ ca sūcitam | yathāsukhamityanena ca svasya saṃvāhanakalākauśalaṃ dhvanitam | saṃvāhayāmi saṃvāhanena khedamapanayāmītyarthaḥ |