The Recognition of Śakuntalā 10.5.121

10.5.121

aprayāsena prayāsābhāvena kṛtārtho gurujanaḥ | "sakhi, avacitāni balikarma pūjākarma tatparyāptāni kusumāni | nanu paramatākṣepe | sakhyāḥ śakuntalāyāḥ saubhāgyadevatārcanīyā | yujyate | tadeva kusumāvacayalakṣaṇameva | sakhi, atithīnāmiva niveditam | bhāve ktaḥ | nanu saṃbodhane | uṭajasaṃnihitā śakuntalā | adya punarhṛdayenāsaṃnihitā | duṣyantagatahṛdayetyarthaḥ | bhavatu | alametāvadbhiḥ kusumaiḥ | vicintayantīti | yaṃ vicintayantyananyamānasā tvaṃ māṃ durvāsasamupasthitamāgataṃ tapodhanam | trayaṃ vidheyam | na vetsi sa tvāṃ svayaṃ na smariṣyatyeva paraṃtu bodhito'pi jñāpito'pi na smariṣyatītyapiśabdārthaḥ | kaḥ kāmiva | prakarṣeṇa mattaḥ prathamaṃ pūrvaṃ kṛtāṃ kathāmiva | sa rājā kīdṛśaḥ | pramatto'vadhānarahitaḥ | "pramādo'navadhānatā" ityamaraḥ | tenāsamarthadoṣaḥ parihṛtaḥ | tvāṃ kīdṛśīṃ pūrvaṃ kṛtāmaṅgīkṛtām | kāvyaliṅgopamāśleṣāḥ | tayatīyeti manamāneti nasasanmiti prapreti chekavṛttyanuprāsāḥ | vaṃśasthaṃ vṛttam | hā dhik | apriyameva saṃvṛttam | kasmiṃścidapi pūjārhe'parāddhā śūnyahṛdayā | na khalu yasminkasminnapi | eṣa durvāsāḥ sulabhakopo maharṣistathā śaptvā vegabalotphullayā durvārayā gatyā pratinivṛttaḥ | ko'nyo hutavahāddagdhuṃ prabhavati | dṛṣṭāntālakāraḥ | gaccha | pādeṣu praṇamya nivartayainam | pādeṣviti dvitīyārthe saptamī | yāvadahamarghodakamupakalpayāmi | tatheti niṣkrāntā | aṣvo iti duḥkhe | "aṣvo sūcanāduḥkhasaṃbhāṣaṇa-" ityādisūtreṇa nipātaḥ | āvegaskhalitayā saṃbhramaskhalitayā gatyā prabhraṣṭaṃ mamāgrahastātpuṣpabhājanam |