The Recognition of Śakuntalā 10.5.128

10.5.128

priyaṃ me | tenotkaṇṭhā paritoṣaśca | ubhayamapyanubhavāmītyarthaḥ | vayaṃ tāvadutkaṇṭhāṃ vinodayiṣyāmaḥ parihariṣyāmaḥ | sā tapasvinyanukampārhā nirvṛtā sukhitā bhavatu | “tapasvī cānukampārhaḥ” ityamaraḥ | tenaitasmiṃścūtaśākhāvalambite nālikerasya samudgake saṃpuṭake tannimittameva kālāntarakṣamā nikṣiptā mayā kesaramālikā bakulamālā tadimāṃ hastasaṃnihitāṃ kuru | gṛhāṇetyarthaḥ | yāvadahamapi tasyai tadartham | “ tādarthye ṅecca ” iti vikalpena ṣaṣṭhīvidhānāt | mṛgarocanāṃ gorocanām | “ mṛgaḥ paśau kuraṅge ca” iti viśvaḥ | tīrthamṛttikā dūrvākisalayāni dūrvāṅkurā ityetadrūpāṇi maṅgalasamālambhanāni maṅgalālaṃkaraṇāni viracayāmyekatra karomītyarthaḥ | “ samālambhanamālepe tilake'laṃkṛtāvapi ” iti yādavaprakāśaḥ | tathā kriyatām | tvarasva | ete khalu hastināpuragāmina ṛṣaya ākāryante | sakhi ehi gacchāvaḥ | eṣā sūryodaya eva śikhāmajjitā majjanaṃ snānaṃ kāritā | abhyaṅgasnānaṃ kāriteti yāvat | pratīṣṭā gṛhītā nīvārā yairevaṃbhūtā hastā yāsāṃ tābhiḥ | śūnyahastānāmāgamanamanucitamiti nīvāretyādyuktiḥ | svastivācanikābhiḥ pāraṃparyeṇa svastivācanādhikāriṇībhistāpasībhistapasvisuvāsinībhirāśīrbhiranugṛhyamāṇā śakuntalā tiṣṭhati | upasarpāva etām | jāte putri bharturbahumānasūtakaṃ mahādevīśabdaṃ labhasva | vatse vīraprasavinī bhava | vatse bharturbahumatā bhava | sukhamañjanaṃ susnānaṃ te bhavatu | svāgataṃ me sakhyoḥ | ito niṣīdatam | sajjā bhava | yāvanmaṅgalasamālambhanaṃ viracayāvaḥ | idamapi bahu mantavyam | durlabhamidānīṃ me sakhīmaṇḍanaṃ bhaviṣyatīti |