The Recognition of Śakuntalā 10.5.134

10.5.134

kokilāravaṃ sūcayitveti nepathyagatanaṭatvena| te hi suśikṣitāḥ sarve śakuntaśabdaṃ kurvanti| anumateti| iyaṃ śakuntalā vanavāsabandhubhiriti rūpakam| tarubhiranumatagamanā yathā kalaṃ parabhṛtavirutaṃ kokilakūjitaṃ tarubhiretādṛśaṃ pratyakṣato'nubhūyamānaṃ prativacanīkṛtaṃ viratasya prativacanena rūpaṇe pratirūpayogātpariṇāmaḥ| evaṃ pūrvatrāpi| anuprāsaśca| aparavaktraṃ vṛttam| ramyāntara iti| kamalinībhirharitaiḥ śyāmalairiti tadguṇālaṃkāraḥ| anena kamalinīvyāptatvaṃ dhvanyate| kamalinīśabdena kamalasaṃyogo'pyata eva na bisinyādipadaprayogaḥ| etādṛśaiḥ sarobhī ramyāṇyantarāṇi madhyāni yasya saḥ| etena komalāṅgyāstanvyāḥ kadācana dṛṣṭasarāṇ:(?) tṛṣādipīḍābhāvo dhvanyate| sarobhiriti bahuvacanena pratipadaṃ sarasaḥ sattvaṃ sūcitam| chāyāpradhānā drumāstaiḥ| tarumātreṇārkatāpanirasaḥ kartuṃ na śakyata iti chāyāpradhānatvaviśeṣaṇaṃ bahuvacanamapi| tena viśrāntisthalasattvaṃ vyajyate| viśeṣaṇaprakramabhaṅgaśca nirastaḥ| niyamito niṣiddho'rkasya mayūkhā dīptayastāsāṃ tāpo yatra saḥ| “mayūkhastviṭ karajvālāsu” ityamaraḥ| atrārkasya dīptyavinābhāve'pi punardīptigrahaṇena madhyāhnasthā dīptirlakṣyate| tāpādhikyaṃ phalam| “arkamarīcitāpasaḥ” iti pāṭhe “uṣṇamarīciḥ” iti paṭhanīyam| anena pūrvavyaṅgyasahakṛto gamane duḥkhābhāvo vyajyate| kuśeśayasyāmbujasya rajovanmṛdū reṇuryatra saḥ| anena caraṇānupaghāto vyajyate | śānto mando'nukūlaḥ pavano yatra saḥ | ata eva śivaḥ śubhaḥ panthā asyā bhūyāt | atraikaścakāro viśeṣaṇānāṃ samuccaye dvitīyastvanupapannaḥ |