The Recognition of Śakuntalā 10.5.141

10.5.141

yadvātaḥ paraṃ mahiṣītvābhiṣekādikaṃ bhāgyāyattaṃ daivāyattaṃ tatkhalu niścitaṃ vadhūbandhubhirna vācyam | vacanamātreṇa tadasaṃpatteriti bhāvaḥ | śrutivṛttyanuprāsau | śārdūlavikrīḍitaṃ vṛttam | na khalu dhīmatāmiti kaṇvavākyaṃ pratyarthāntaranyāsaḥ | sā tvamityasya ślokenānvayaḥ | śuśrūṣasveti| gurūñśvaśuraśvaśurādīñchuśrūṣasva sevāṃ kuru | sapatnīnāṃ jane samūhe priyasakhīnāmiva vṛtti kuru priyasakhīvadvartasva | viprakṛtā nyakkatāpi " nikāro viprakāraḥ syāt ” ityamaraḥ | roṣaṇatayerṣyāyā bhartuḥ pratīpaṃ vaiparītyaṃ mā sma gamo mā yāsīḥ | parijane sevakavarge bhūyiṣṭhamatiśayena dakṣiṇānukūlā bhava | bhāgyeṣu sapatnīdaiveṣvanutsekinyaskhalitā bhavetyanuṣajyate | asyā bhāgyaṃ mama nāstīti duḥkhaṃ na kāryamityarthaḥ | atha ca bhāgyeṣu nijeṣvanutsekinī nirgarvā mamaitādṛśaṃ saubhāgyamiti garvo na kārya ityarthaḥ | "udomardanotkṣepaṇagarvaskhalaneṣu ” iti gaṇapāṭhāt | evaṃ sati yuvatayaḥ strīmātraṃ tvaṃ tu kiṃ punariti bhāvaḥ | gṛhiṇyāḥ padaṃ sthānam | yadvā gṛhiṇīti padamadhikāram | yānti prāpnuvanti | anyā vāmāḥ striyaḥ kulasyādhayo bhavantītyarthaḥ | "vāmau valgupratīpau vā” ityamaraḥ | rūpakamarthāntaranyāso vā | kulasyādhayaḥ kulādhiṣṭhānāni vāmā vakrāṇītyarthaḥ | " ādhirmānasapīḍāyāṃ pratyāśāyāṃ ca bandhane | vyasane cāpyadhiṣṭhāne ” iti viśvaḥ | vṛttamanantaroktam | etāvānvadhūnanasyopadeśaḥ | jāte putri | etatkhalu sarvamavadhāraya | tāta itaḥ kiṃ priyaṃvadāmiśrāḥ sakhyo nivartiṣyante |