The Recognition of Śakuntalā 10.5.156

10.5.156

rakṣaṇāya kalpase prabhavasi | bhayāt “śatrubhyo dhanadānena” ityādi rakṣaṇaṃ bahuprakāram | atanuṣu bahvīṣu saṃpatsu | nāmeti saṃbhāvanāyām | jñātayaḥ santu bhavantu | bandhukṛtyakāriṇa ityarthaḥ | tuḥ pūrvato viśeṣe | sati vibhave'sati ca vibhave | prajānāṃ prajāsu viṣaye | ṣaṣṭhīsaptamyorabhedādvandhūnāṃ jyeṣṭhabandhūnāṃ kṛtyamamārgānnivartanaṃ kalahaśamanaṃ rakṣaṇaṃ ca tattvayi parisamāptaṃ tvayaiva niṣpādyate nānyenetyarthaḥ | atra pūrvārdhārtho hetutvenopāttaḥ | kāvyaliṅgavyatirekānuprāsāḥ | pūrvārdhe yamakaṃ ca | vṛttamanantaroktam | anena ca padyena pūrve lokahetoriti yaduktaṃ tadeva vivṛtam | navīkṛtāḥ | adhikāracintana iti śeṣaḥ | ataevāsmābhistatrāśāntamanā iti vyākhyātam | yatastasyaivānuvādo'yaṃ klāntamanasa iti | abhinavaṃ nūtanaṃ yatsaṃmārjanaṃ tena saśrīkaḥ saśobhaḥ | sannihitahomadhenuriti | viśeṣaṇadvayena pāvitryātiśayo dyotyate | agniśaraṇālindo'gnihotragṛhabahirdvāraprakoṣṭhaḥ | “praghāṇapraghaṇālindā bahirdvāraprakoṣṭhake” ityamaraḥ | svabhāvoktiḥ | tasya khedavinodaṃ dyotayati | ārohatu devaḥ | parijanāṃsāvalambīti khedānubhāva eva | kiṃ tāvaditi | vratināṃ niyamavatāmataevopoṭamalyūḍhamadhikaṃ tapo yeṣām | “upoṭaḥ kathito'tyūḍhe samāpanne vivāhite” iti dharaṇiḥ | īdṛśāṃ tapasvināṃ viśeṣaṇenaiva viśeṣyapratipatterna tadupadānam | tapo vighnairvighnakartṛbhī rākṣasādibhiḥ | sādhyavasāneyaṃ lakṣaṇā | tasyā vighnātiśayaḥ phalaṃ darśitam | kimiti vitarke | uta dharmāraṇyacareṣu dharmavanageṣu prāṇiṣu jantuṣu |