The Recognition of Śakuntalā 10.5.165

10.5.165

prakarīlakṣaṇaṃ bhāvaprakāśikāyām - " śobhāyai vaidikādīnāṃ yathā puṣpākṣatādayaḥ | athartuvarṇanādistu prasaṅge prakarī bhavet " iti | yathātraiva ṣaṣṭhe'ṅke | "tataḥ praviśati cūtāṅkura - " ityādinā "nepathya" ityantena | anena tu "phalaṃ tu kalpyate yasyāḥ parārthāyaiva kevalam | anubandhavihīnānāṃ prakarī śrūyate yathā" iti lakṣaṇānusāreṇa mātalivṛttāntaṃ prakarīvṛttamāhustanna | saṃdhisamāptiviṣaye tasyoddeśādaṅgānāṃ tadanugāmitvaṃ nāyāti | niyatāptilakṣaṇamādibharate - "niyatāṃ tu phalaprāptiṃ yadā bhāvena paśyati | niyatāṃ tu phalaprāptiṃ saguṇaḥ paricakṣate " iti | nirvarṇya dṛṣṭvā | idāmiti | evamupanatamayatnaprāptam | na kliṣṭā kāntiryasya tat | anena prathamaṃ tāruṇyaṃ dhvanitam | idaṃ rūpaṃ prathamagṛhītaṃ syānna vā syāditi vyavasyanvicārayan | "avyavasyan " iti pāṭhe svavyavasāyaṃ na jānan | khalu niścayena | paribhoktuṃ na śaknomi niścayena hātuṃ naiva śaknomītyeva prakāreṇa rateranusaṃdhānaṃ dhvanitam | kaḥ kimiva | vibhāte prabhāte amaraḥ | antastuṣāro himaṃ yasya tādṛkkundapuṣpamiva | upari himasyācchādakasya śāpasthānīyatvāttyāgābhāvaḥ | sasaṃdehopamānuprāsāḥ | atra pra(vi)bhāta ityuktestadanantaraṃ ravikiraṇairhime nīte makarandabhogo'vaśyam | evamihāpyabhijñānadarśanena śāpe gate tatsvīkāro'vaśyamiti dyotayantyopamayā 'rateḥ sthāyitvadārḍhyaṃ dhvanitam | mālinī vṛttam | etena saṃśayanāmakaṃ bhūṣaṇamupakṣiptam | tallakṣaṇaṃ tu- "aniścayāntaṃ yadvākyaṃ saṃśayaḥ sa nigadyate " iti | vicārayanniti utkṣiptaikabhrūbhāvādinā | aho āścarya |