The Recognition of Śakuntalā 10.5.190

10.5.190

yasya tādṛgalpaṃ phalamityarthaḥ | saṃdehālaṃkāraḥ | ataḥparamete tvayocyamānā mayā vāśaṃsyamānā manorathāḥ | nāmetyalīke | alīkā manorathā ityarthaḥ | te taṭaprapātā iti bhinnarūpakam | yathā varṣāsamaye gaṅgādestaṭā oghena pīḍyamānā ahamahamikayā patanti | ekaḥ patati taduparyaṃnyastaduparītaraḥ | evaṃ manorathānāmeke vilīyante'nya utpadyante te'pi vilīyante taditare utpadyanta ityarthaḥ | “ prapātastvataṭo bhṛguḥ ” iti kośātpunaruktavadābhāsaḥ | numāṃnumeti tamemateti chekavṛttyanuprāsau | dvādaśayupajātirindravajropendravajrayoḥ | maivam | nanvaṅguliyakameva nidarśanamudāharaṇam | avaśyaṃbhāvyacintanīyaḥ samāgamo bhavatīti | “ vidūṣakaḥ—jai evvam ” ityādināaitadantena rocananāmāṅgamupakṣiptam | tallakṣaṇaṃ daśarūpake— “ siddhāmantraṇato bhāvidarśikā syātprarocanā ” iti | na sulabhamasulabhaṃ tacca tatsthānaṃ ca tasmādṛśo'syāsti tat | śakuntalāṅgulibhraṃśītyarthaḥ | ataeva śocanīyam | taveti | he aṅgulīya nūnaṃ niścitaṃ tava sucaritaṃ puṇyaṃ mameva pratanvalpaṃ vibhāvyate jñāyate | atīndriyasya dharmasya pratanutvaṃ kathaṃ jñātuṃ śakyata ityata āha-phaleneti | atyalpaphalatvena hetunetyarthaḥ | mameveti sahopamā | tena mamāpi puṇyamalpaṃ tavāpītyarthaḥ | tasya svasyālpapuṇyatve hetuḥ pūrve darśitaḥ | asyālpapuṇyatve hetumāha-aruṇeti | yasmāttasyā vijitatribhuvanasundaryā mayi nirvyājamanuraktāyāḥ puraḥ parisphurantyā ivāṅgulīṣu puruṣāṅgulīyasya sthūlatvātkadācitkaniṣṭhikāyāṃ tatra śithilaṃ sadanyāṅgalau tatrāpi tathāvidhamitarāṅgulyāmiti bahuvacanābhiprāyaḥ |