The Recognition of Śakuntalā 10.5.192

10.5.192

tatrabhavatyāḥ śakuntalāyā hastābhyāsaṃ hastanaikaṭyaṃ prāpitā tvayā tasyai kimarthaṃ datteti vacane'naucityaprasaṅgādetādṛguktiḥ | mamāpi kautūhalenākārita eṣaḥ | ākārita iveti gamyotprekṣā | mamāpyetacchravaṇe kautūhalamāsīt | tadevānena pṛṣṭamiti bhāvaḥ | kiyaccireṇa kiyatā vilambena pratipattiṃ vārtāmiti yāvat | "pratipattiḥ pravṛttau syāt” iti dharaṇiḥ | ekaikamiti | atra mudrikāyāṃ divase divase madīyamekaikaṃ nāmākṣaraṃ gaṇaya | yāvattadgaṇanamantaṃ gacchati yāvadgaṇanasamāptirityarthaḥ | tricaturairdinairiti bhāvaḥ | he priye mamāvarodhagṛhamantaḥpuraṃ tatra praveśastaṃ netā prāpayitā janastava samīpamupaiṣyatīti mayāpi pratyabhihiteti saṃbandhaḥ | chekavṛttyanuprāsau kāvyaliṅgaṃ ca | vasantatilakaṃ vṛttam | mayā vismṛtatādṛśasnehadurjanadhuraṃdhareṇetyādi vyajyate | dāruṇātmaneti tādṛśavyaṅgyāvakāśadānāya | ramaṇīyaḥ khalvavadhirvidhinā daivena śāpalakṣaṇena ca visaṃvāditaḥ | kathaṃ dhīvarakalpitasya kaivartekhaṇḍitasya rohitamatsyasyodarābhyantara āsīt | śacītīrthamiti gaṅgāyāṃ śakrāvatārāparaparyāyastīrthaviśeṣa ucyate | yujyate | ataevāṅgulīyakadarśanādeva tapasvinyā anukampārhāyāḥ śakuntalāyā adharmabhīrorasya rājarṣeḥ pariṇaye saṃdeha āsīt| athavedṛśo'nurāgo'bhijñānamapekṣate | kathamivaitat | śāpājñānādasyā īdṛśayuktiḥ | upālapsye'syopālambhaṃ kariṣye | anenonmādaḥ | gṛhīto'nena panthā unmattānām | kathamiti | nviti praśne | bandhurāḥ sundarāḥ komalā aṅgulayo yatra tam | “ bandhuraṃ sundare ramye ” iti viśvaḥ |