The Recognition of Śakuntalā 10.5.193

10.5.193

etadviśeṣaṇaprayojanametatpūrvatarapadye nirūpitam | taṃ raktotpalacchavimatisukulaṃ mayā vāraṃvāraṃ svahṛdayanyastaṃ yenātiprītyā tava dhāraṇaṃ kṛtaṃ pura iva parisphurantaṃ karaṃ vihāya tyaktvā | anena buddhipūrvakastyāga ukto na mohādbhraṃśaḥ | kathamambhasi nimagnamasi | tvaṃ tvalaṃkaraṇaṃ tena tava dṛśyameva prayojanaṃ tatkarasthamapi dṛśyameva sthitaṃ sayadamambhasi nitarāṃ magnamadṛśyatvaṃ gatamiti katham | evaṃ tatkaratyāgastatrāpyadṛśyatvagamanamityupālambhadvayam | atra cetanavyavahārāropātsamāsoktiḥ | sā ca gurutvātsvābhāviko jalapātastatkartṛtvenocyata iti svābhāvikakṛtrimayorabhedādhyavasāyādatiśayoktigarbhā | athaveti vṛttākṣepālaṃkāraḥ | nāmeti prasiddhau | acetanaṃ kartṛguṇaṃ saundaryādikaṃ premādikaṃ ca na lakṣayedityarthāntaranyāsaḥ | tvayā tvacetanatvādidaṃ kṛtaṃ mayā tu sacetanenāpyatyanucitakāriṇā tvāṃ prati kiṃ vaktavyam | mayaivetyevaśabdāryaḥ | kasmādakāraṇakamityarthaḥ | strīmātraṃ na bhavatyapi tu priyā | avadhīritā tiraskṛtā na tu tyaktā| tyaktāyāḥ punarupādāne mahāpuruṣasyānaucityaprasaṅgāt | avadhīraṇākāraṇābhāve tadutpattervibhāvanā | śrutyanuprāsavṛtyanuprāsayoḥ saṃkaraḥ | vaṃśasthaṃ vṛttam | kathaṃ bubhukṣayā khāditavyo'smi | asāvunmatto'ta eva viṣayāntarasaṃcārābhāvānmayā bhojanārthaṃ gantumaśakyamiti bhāvaḥ | atha cāhaṃ yathā bubhukṣayā bhakṣitavyastathāyamapi tayā bhakṣitavyamapyarthaḥ(?)| prakaraṇabalādbubhukṣeti strīliṅganirdeśācca | kasmādavadhīritā priyetyatra priyāsmaraṇātsaṃkalpopanītāṃ pratyāha—akāraṇeti |