The Recognition of Śakuntalā 10.5.196

10.5.196

avalambasva citraphalakaṃ yāvadāgacchāmi | sākṣāditi | pūrvamavyavahitasamaye na tu kālāntare | anyathopagatāmiti prakṛtipratyayārthenārthapaunaruktyaṃ syāt | kevalaṃ nārīmātraṃ nāpi tu priyāṃ sākṣātpratyakṣeṇa | "sākṣātpratyakṣatulyayoḥ " ityamaraḥ | upa samīpe gatāṃ prāptāṃ natvābhāsamātreṇa natvaśrutāgamanam | atha ca pratyakṣeṇa priyāmiti jñātāmapahāyāvagaṇayya na tu tyaktvā | tyaktasya punarupādāne mahāpuruṣasyānaucityaprasaṅgāt | punaranantaraṃ citrārpitāṃ likhitāmimāṃ purato dṛśyamānāṃ bahu manyamāna ādareṇāvalokamānaḥ | pathi mārge nikāmajalāṃ saṃpūrṇodakāṃ srotovahāṃ nadīm | atha ca yato nikāmajalāmataḥ srotovahāṃ pravahadrūpāmiti ca yojyam| atītyātikramya mṛgatṛṣṇikāyāṃ marumarīcikāyāṃ praṇayavānprītiyukto jātaḥ | hetunidarśanā | śrutivṛttyanuprāsāḥ | mupamapeti manyamāna iti chekānuprāso'pi | apahāya bahumanyamāna ityanayornirhetukatvaṃ nāśaṅkanīyam | śāpasya tanmokṣeṇa virahasya prakaraṇalabhyatvāt | vasantatilakā vṛttam | eṣo'trabhavāndīmatikramya mṛgatṛṣṇikāṃ saṃkrāntaḥ | ayametasyāḥ kathaṃ nivartanīyo bhaviṣyatītyāśayaḥ | pūrvamunmattānāṃ panthā anena gṛhīta ityukteḥ | bho aparaṃ kimatra likhitavyam | yo yaḥ pradeśaḥ sakhyāḥ saṃbandhī me'bhirūpaḥ sundarastaṃ tamālikhitukāmo bhavet | kāryeti | anena padyenāśramasthaṃ pūrvānubhūtaṃ tadānīṃtanamuddīpanaṃ vibhāvagaṇaṃ smarati te ca smṛtāḥ saṃbhramapravāsahetukaṃ virahameva poṣayanti| saikate līnaṃ haṃsamithunaṃ yasyāḥ sā | anenoddīpakatvātiśayo vyajyate | mālinīnāmnī srotovahā nadī kāryā |